مقامِ إدّعاده محترم مدّعى‌عمومى‌نڭ تجزيه‌مه مدار اولمق ايچون بيان ايتديگى أسبابڭ جوابلرى صوڭ مدافعاتمده واردر. بو صوڭ إدّعاده ايكى نقطه او درجه إعظام ايديلمش كه، نظرِ عدالتى شاشرته‌جق بر صورتده بيوتلمشدر.

برنجى نقطه: مقامِ إدّعا دييور كه: ”إسپارطه، أگيردير، بارلا، آيدين، آنطاليه، ميلاس و وان“ گبى يرلر دائرۀِ تشويقاتنه داخل اولمش. حالبوكه سائر طقسان يدى معصومڭ تخليه‌سيله تبيّن ايدييور كه؛ آنطاليه نامنى ويرديگى، قيصه‌جق و ايمانى بر تك رساله‌يى اوقويان إختيار بر تك آشجى و أگيردير نامنى ويرديگى، ايكى حديثِ شريفڭ بر نكته‌سنى بيان ايدن كوچك بر مكتوب اونده بولونديغى و مخاطبى ده كنديسى اولماديغى آڭلاشيلان و برائتى مقامِ إدّعاده طلب ايديلن بر حافظ و برى ده بريسنه مسلك طولاييسيله عادى بر قيصه مكتوبله ايمانى بر رساله‌يى يازان بر ذاتدر. و قوجه آيدين نامى ويرديگى، پوسته‌دن آلمديغى بر قوطويه دائر عادى بر مكتوب اونده بولونان يتمش ياشنده عَتَهْ گتيرمش بر إختيار؛ ميلاس نامى ويرديگى، مطالعه مراقنه مبتلا و إصراريله اوقومق ايچون بندن ايستديگى بر قاچ رساله اونده بولونان بر تك بيچاره آدمله، اوڭا بر تك مكتوب تسويد ايدن و هيچ بر شيده علاقه‌سى اولميان قهوه‌جى بر آدم و وان نامى ويرديگى، اونبش سنه أوّل طبع ايديلن بر رساله‌م اونده بولونان بر آدمدر. و طوقوز سنه اوطورديغم بارلا نامى ويرديگى، بر قاچ پاره‌يه مقابل طوقوز سنه أوّل إستانبولده طبع ايديلن اوننجى سوز گبى صِرف ايمانى كوچوجك بر قاچ رساله‌يى يازان فقير و مهاجر و چوق إحتياطكار بر زواللى آدم و إسپارطه نامى ويرديگى، يالڭز ايمانى و محكمه‌جه تنقيد ايديلمه‌ين بر ايكى رساله‌مى اوقويوب كنديلرينه يازمالرى سببيله بنم ايله جزئى علاقه‌لرى بولونان يدى قدر معصوم بيچاره‌لردر.