و هكذا ايشته حقّمده ناصل حبّه‌نڭ قبّه ياپيلديغنى بوڭا قياس ايديلسين. محكمه‌ڭزده گورولن و بنم ايله علاقه‌لرى پك آز اولديغى آڭلاشيلان بو بر قاچ آدمڭ نامنى بش آلتى شهرِ عظيمه ويروب، او شهرلرى دخى دائرۀِ تشويقاته داخل اولدقلرينى گوسترمك، مقامِ إدّعانڭ إستناد ايتديگى صورغو حاكملرينڭ تحقيقاتى، اونلرڭ ده سطحى تحقيقاتى ملحد ظالملرڭ أوهاملرينه إستناد ايتدكلرى ايچون، بيچاره آشجى حسينى قوجه آنطاليه شهرى حكمنده طوتوب، يتمش ياشنده عَتَهْ گتيرمش بر إختيارى قوجه آيدين ولايتى گوستريله‌رك بر دائرۀِ تشويق معناسى ويريلمش و هكذا ديگرلرى بونلره قياسًا بيوتلمشدر

ايكنجى نقطه: مقامِ إدّعاده تجزيه‌مه مدار گوسترديگى يدى سكز لمعه اولوب، هر بر لمعه لا أقل بيڭ كلمه‌دن عبارت ايكن، بر ايكى كلمه‌نڭ ظاهرى نظرلرنده تنقيده لايق گورولمكله گويا بتون او لمعه‌لر مدارِ تنقيددر دييه تجزيه‌مه سبب گوستريلييور. تنقيد ايديلن اون اونبش كلمه يرينه، اون اونبش كتابى گوسترييور. بو ايسه بر حبّه‌يى اون قبّه ياپمقدر. تجزيه ايسه، حسّاس بر ميزانده خطا ايله جزا طارتيلير. بويله إفراطكارانه إتهاملره، معنوياتڭ ميزانى اولان عدالتڭ علاجلرى نوعنده اولان جزالرى او مبالغه‌لى إتهاملره گوره ويريلمز

هم كتابلرڭ فهرسته‌سى اولان اون بشنجى لمعه‌ده، هيچ موجود اولميان بعض رساله‌لرڭ موضوعندن بحث ايتديگندن، او مجمل موضوعاتى قوجه بر رساله و تفصيللى جواب يرنده اولارق گوستريلمشدر. حالبوكه فهرسته ايله هيچ بر جهتله مؤاخذه اولاماز. هم فهرسته نه ديديگمى بيان ايتمييور، يالڭز جواب ويرديگمه إشارت ايدييور. جوابم نه‌در و نره‌ده‌در؟ ماهيتى آڭلاشيلدقدن صوڭره تجزيه‌مه بر مدار گوستريله‌بيلير. بو يوكسك محكمۀِ عادله‌نڭ عدالتندن و هيئتڭ ده حق‌پرستانه وجدانلرندن قوّتله اُميد ايدييورم كه، تجزيه‌مله بو زمانده بنى إنكارِ عدالته سَوق ايتميه‌جكدر. برائتمه و رسالۀِ نورڭ حرّيتنه قرار ويريلمسنه عنايتِ إلٰهيه بو يوكسك محكمۀِ عادله‌يى موفّق أيله‌سين