أوت ناصلكه بعضًا بش پاره‌لق بر مادّه‌ده بش ليرالق بر صنعت درج ايديلير. او زمان او شيئڭ مادّه‌سى نظره آلينمييور، صنعت نقطه‌سنده قيمت ويريلييور. سينگڭ كوچوجك مادّه‌سى و ايچنده‌كى پك بيوك صنعتِ ربّانيه گبى... بعضًا بش ليرالق بر مادّه‌ده بش غروشلق بر صنعت بولونور، او وقت حكم مادّه‌نڭدر.

عينًا اونڭ گبى، بعضًا جسمانى بر مادّه‌ده او قدر نعمت و رحمت معناسى بولونور كه، يوز دفعه مادّه‌سندن زياده أهمّيتلى اولويور. عادتا جسمانى مادّه‌سى گيزله‌نير؛ حكم، نعمتيت جهتنه باقار. ايشته دميرڭ پك عظيم منافعى و چوق ثمره‌لرى اونڭ مادّى مادّه‌سنى گيزلديگى گبى؛ مذكور بو مبارك حيوانلرڭ دخى هر جزئنده نعمت بولونماسى، اونلرڭ جسمانى مادّه‌لرينى گويا نعمته قلب ايتديرمش. اونڭ ايچوندر كه، جسمانى مادّه‌لرڭ حكمى نظره آلينمادن، معنوى صفتلرى نظره آلينمش، {وَاَنْزَلْنَا}، {وَاَنْزَلَ} تعبير ايديلمشدر.

أوت {وَاَنْزَلْنَا}، {وَاَنْزَلَ} حقيقت إعتباريله سابق نكته‌يى إفاده ايتدكلرى گبى، بلاغت نقطه‌سنده ده أهمّيتلى بر معنايى معجزانه إفاده ايدييورلر. شويله كه

دمير غايت سرت فطرتيله و گيزليلگى و درينلگيله برابر، هر يرده حاضر بولونمق و خمور گبى يوموشاتمق خاصيتنى إحسان ايتديگندن، هركس، هر يرده، هر ايشده قولايجه ألده ايتمه‌سنى إفاده ايتمك ايچون {اَنْزَلْنَا الْحَدِيدَ} تعبيريله گويا فطرى و سماوى نعمتلر گبى، دمير آلَتلرينى يوقارى بر تزگاهدن اينديروب بشرڭ أللرينه ويريلمش گبى قولايلقله ألده ايديلييور