رسالۀِ نور طلبه‌لرى، رسالۀِ نورڭ دائره‌سى خارجنده نور آراماملى و آراماز. أگر آرارسه، رسالۀِ نورڭ پنجره‌سندن ايشيق ويرن معنوى گونشه بدل، بر لامبايى بولور، بلكه گونشى غائب ايدر.

هم رسالۀِ نورڭ دائره‌سنده‌كى خالص، پك قوّتلى و هر فردينه چوق روحلرى قزانديران و صحابه‌نڭ سرِّ وراثتِ نبوّتله مشربِ اخوّتكارانه‌سنى گوسترن مشربِ خلّت و مسلكِ اخوّت ايسه؛ خارج دائره‌لرده (او پدره و او مرشده اوچ جهتله ضرر ويرمك صورتيله) بر پدرى آرامغه إحتياج بيراقماز. بر تك پدر يرينه پك چوق آغابگى بولديرر. ألبته بيوك قارداشلرڭ متعدّد شفقتلرى، بر پدرڭ شفقتنى هيچه اينديرر. دائره‌يه گيرمه‌دن أوّل بولديغى شيخى، هر فرد او شيخنى، مرشدينى دائره‌ده دخى محافظه ايده‌بيلير. فقط شيخى اولميان، دائره‌يه گيردكدن صوڭره آنجق دائره ايچنده مرشد آرايه‌بيلير.

هم رسالۀِ نورڭ ولايتِ كبرا اولان سرِّ وراثتِ نبوّت فيضنى ويرن درسِ حقائق دائره‌سنده‌كى علمِ حقيقت دخى، دائره خارجنده‌كى طريقتلره إحتياج بيراقماز. مگر طريقتى ياڭليش آڭلايوب گوزل رؤيالر، خياللر، نورلره و ذوقلره مبتلا و آخرت فضيلتندن آيرى اولان دنيوى و هوسى ذوقلرى آرزولايان و مرجعيت مقامنى ايسته‌ين نفس‌پرستلر اوله.

بو دنيا دار الخدمتدر. كلفت و مشقّتله اجرت ئولچولور. دار المكافات دگل. اونڭ ايچوندر كه، أهلِ حقيقت كشف و كرامتده‌كى أذواق و أنواره أهمّيت ويرمييورلر. بلكه بعضًا قاچييورلر، سترينى ايسته‌يورلر.