قلبمه إخطار ايديلدى كه: ناصلكه مثنوئِ شريف، شمسِ قرآندن تظاهر ايدن يدى حقيقتندن بر حقيقتڭ آيينه‌سى اولمش، قدسى بر شرف آلمش؛ مولويلردن باشقه داها چوق أهلِ قلبڭ لا يموت بر مرشدى اولمش.

اويله ده، رسالۀِ نور شمسِ قرآنيه‌نڭ ضياسنده‌كى ألوانِ سبعه‌يى و او گونشده‌كى رنك رنك، چشيد چشيد يدى نورى بردن آيينه‌سنده تمثّل ايتديرديگندن، إن شاء اﷲ يدى جهتله شريف و قدسى و يدى مثنوى قدر أهلِ حقيقته باقى بر رهبر و بر مرشد اولاجق.

قارداشلرم!

حفيظِ ذو الجلالڭ حفظ و حمايتنه باقڭز كه؛ مسئله‌مز مناسبتيله رسالۀِ نورڭ رساله‌لرى عددينه موافق اولارق، يوز يگرمى كسور آدمڭ محرم أوراقلرى ايله إستنطاقده اولدقلرى حالده؛ و أجنبيلرڭ أنتريقه‌لريله و مخالف قوميته‌جيلرڭ دولابلريله موجود و متعدّد جمعيتلرڭ هيچ بريله، رسالۀِ نورڭ هيچ بر شاكردينڭ مناسبتدارلغنى گوستره‌جك هيچ بر مادّه بولونمامسى، غايت ظاهر و پارلاق بر حمايۀِ ربّانيه و بر محافظۀِ إلٰهيه و إمامِ على و غوثِ أعظمڭ رسالۀِ نوره عائد كرامتِ غيبيه‌لرينى جدًّا تأييد ايدن بر عنايتِ رحمانيه‌در.

قرق ايكيلك بر طوپ گلّه‌سنى، قرق ايكى معصوم و مظلوم قارداشلريمزڭ درگاهِ إلٰهيه‌يه آچيلان أللريله طورديروب، گرى چويروب، آتانلرڭ باشلرنده معنًا پاتلاتديردى. بزلره ضررى يالڭز أهمّيتسز و ثوابلى، خفيف بر قاچ ياره بره‌دن باشقه اولمادى. بويله بر سنه‌دن بَرى طولديريلان بر طوپدن، بويله پك آز ضررله قورتولمق خارقه‌در.