فنِّ عسكريه دييه‌جك كه: ”أرض بر اوردوگاهدر. هر بهار موسمنده يڭى تحتِ سلاحه آلينمش و زمين يوزنده چاديرلرى قورولمش درت يوز بيڭ مختلف ملّتلر او اوردوده بولونديغى حالده؛ آيرى آيرى أرزاقلرى، آيرى آيرى لباسلرى، سلاحلرى، آيرى آيرى تعليماتلرى، ترخيصاتلرى كمالِ إنتظامله هيچ برينى اونوتميه‌رق و شاشيرميه‌رق، بر تك قوماندانِ أعظمڭ أمريله، قوّتيله، مرحمتيله، خزينه‌سيله غايت منتظم ياپيلوب، إداره ايديلييور.“

و فنِّ ألكتريقدن صورولسه، ألبته دييه‌جك: ”بو محتشم سراىِ كائناتڭ طامى، غايت إنتظاملى، ميزانلى حدسز ألكتريق لامبالريله تزيين ايديلمشدر. فقط او قدر خارقه بر إنتظام و ميزان ايله‌در كه؛ باشده گونش اولارق كُرۀِ أرضدن بيڭ دفعه بيوك او سماوى لامبالر، متماديًا ياندقلرى حالده موازنه‌لرينى بوزمييورلر، پاطلاق ويرمييورلر، يانغين چيقارمييورلر. صرفياتلرى حدسز اولديغى حالده، وارداتلرى و غازياغلرى و مادّۀِ إشتعاللرى نره‌دن گلييور؟ نه‌دن توكنمييور؟ نه‌دن يانمق موازنه‌سى بوزولمييور؟.. كوچك بر لامبا دخى منتظم باقيلمازسه، سونر. قوزموغرافيا‌جه كُرۀِ أرضدن بر ميليوندن زياده بيوك و بر ميليون سنه‌دن زياده ياشايان گونشى (حاشيه) كومورسز، ياغسز يانديران؛ سوندورمه‌ين حكيمِ ذو الجلالڭ حكمتنه، قدرتنه باق. ”سبحان اﷲ“ دى. گونشڭ مدّتِ عمرنده گچن دقيقه‌لرينڭ عاشراتى عددنجه ”ما شاء اﷲ، بارك اﷲ، لاَ اِلٰهَ اِلاَّ هُو“ سويله

-----------------------------------------------------------------------------

(حاشيه : عجبا دنيا سراينى ايصينديران گونش صوباسنه وياخود لامباسنه نه قدر اودون و كومور و غازياغى لازم اولديغى حساب ايديلسين. هر گون يانماسى ايچون (قوزموغرافيانڭ سوزينه باقيلسه) بر ميليون كُرۀِ أرض قدر اودون ييغينلرى و بيڭلر دڭزلر قدر غازياغى گركدر. شيمدى دوشون؛ اونى اودونسز، غازسز دائمى ايشيقلانديران قديرِ ذو الجلالڭ حشمتنه، حكمتنه، قدرتنه گونشڭ ذرّه‌لرى عددنجه “سبحان اﷲ، ما شاء اﷲ، بارك اﷲ“ دى