أوت قرآنڭ عليهنده بيڭ سنه‌دن بَرى منتقمانه حاضرلانان دينسزلرڭ إعتراضلرينى و كافر فيلسوفلرڭ تراكم ايدوب شيمدى يول بولارق إنتشار ايدن شبهه‌لرينى و قرآنڭ دهشتلى ضربه‌لرندن إنتقام بسله‌ين معنّد يهوديلرڭ و مغرور بر قسم خرستيانلرڭ هجوملرينى دفع ايدوب مقابله ايدن و هر عصرده قرآنڭ پك چوق قهرمانلرى و معنوى قلعه‌لرى واردى. شيمدى إحتياج بر ايكيدن، يوزه چيقمش. و مدافعلر يوزدن، ايكى اوچه اينمش. هم حقائقِ ايمانيه‌يى، علمِ كلامدن و مدرسه‌دن اوگرنمك چوق زمانه محتاج بولونديغندن بو زمانده او قپو دخى قپاندى. هم چابوق، هم هركس آڭلايه‌جق بر طرزده أڭ درين حقيقتلرى تعليم ايدن رسالۀِ النور، ألبته إمامِ على رضى اﷲ عنهڭ بو إلتفاتنه لايقدر

هم إمامِ على (رض) اوننجى مرتبۀِ تعدادنده اوننجى سوره اولارق و قيامت و ليلۀِ برائته باقان {وَبِسُورَةِ الدُّخَانِ فِيهَا سِرًّا قَدْ اُحْكِمَتْ} دييوب معناىِ إشاريسيله اوننجى سوز نامنده و مرتبه‌سنده اولان حشر رساله‌سنه إشارتله برابر او رساله‌نڭ فوق العاده أهمّيتنى و غايت محكم اولديغنى و او زمانڭ دومانلى قراڭلقلرينى إزاله ايدن بر ليلۀِ برائتڭ بر قنديلى حكمنده بولونماسنه و حشر و قيامتڭ بر علامتى اولان دخان، هم ليلۀِ برائتڭ سنوى اولارق حكمتلى تفريق و تقسيمِ امور نقطه‌لريله و باشقه قرينه‌لر ايله ايماءً و رمزًا خبر ويرييور

أوت اوننجى سوز، چوق أهمّيتلى بر بلايى دفع ايتدى. حرّيتِ أفكار سربستيتى و حربِ عمومى صارصينتيسى وقتنده حشرى إنكار ايدن منافقلر، فرصت بولوب چوق يرلرده زهرلى فكرلرينى إظهاره باشلادقلرى بر زمانده، اوننجى سوز چيقدى و طبع ايديلدى. بيڭ نسخه‌سى أطرافه ياييلدى. اونى گورن هركس كمالِ إشتياق و مراقله اوقودى. زنديقلرڭ كافرانه فكرلرينى تام قيردى و اونلرى صوصديردى. إمامِ على رضى اﷲ عنهڭ بو تقديرينه لياقتنى إثبات ايتدى. كيمڭ شبهه‌سى وارسه گلسين اونى دقّتله اوقوسون، حشرڭ نه قدر قوّتلى بر برهانى اولديغنى گورسون