هم حضرتِ إمامِ على رضى اﷲ عنه اون طوقوزنجى سوره اولارق سورة النورى

بِسِرِّ حَوَامِيمِ الْكِتَابِ جَمِيعِهَا ❊ عَلَيْكَ بِفَضْلِ النُّورِ يَا نُورُ اُقْسِمَتْ

فقره‌سيله ذكر ايده‌رك پك مختصر اولان اون طوقوزنجى سوزه و پك مكمّل بولونان اون طوقوزنجى مكتوبه إشارت ايچون نور لفظنى تكرار ايتمكله مكتوبلرڭ مرتبه‌سى، يعنى اون دردنجى مكتوب نقصان قالماسنه ايماءً سورۀِ نورى اون بشنجيده ينه ذكر ايتمسيله غايت لطيف و مدقّقانه خبر ويرييور. و او ايكى رساله‌لرى رسالۀِ نورڭ بيوك نورلرى اولدقلرينى بيلديرييور. أوت رسالتِ محمّديه عليه الصلاة والسلامه دائر اولان اون طوقوزنجى سوز، هم اوچ جهتله كرامتلى و خارقه اولان اون طوقوزنجى مكتوب الحقّ رسالۀِ نورڭ أڭ پارلاق برر نوريدرلر. و عائشۀِ صدّيقه رضى اﷲ عنهانڭ برائتى مناسبتيله، آيتِ نورڭ {مَثَلُ نُورِهِ} كلمه‌سنده‌كى ضمير، اوچ وجهدن بريسى ايله محمّد عليه الصلاة والسلامه راجع اولمق حيثيتيله سورۀِ نور ذاتِ محمّديه عليه الصلاة والسلام ايله زياده علاقه‌دار بولونديغندن، او سوره ايله رسالتِ محمّديه عليه الصلاة والسلامى إثبات ايدن او ايكى رساله‌يه ايكى نور لفظيله، بلكه اوچ نور كلمه‌لريله ينه عينًا رسالتِ أحمديه عليه الصلاة والسلامى إثبات ايدن معراج رساله‌سنه دخى إشارت ايتمش. بن إعتراف ايدييورم كه: اون دردنجى مكتوب نقصان قالديغنى اونوتمشدم. حضرتِ إمامِ على (رض) عين سوره‌يى ايكى دفعه تكرار ايتمه‌سيله تخطّر ايتدم و إشاراتنده‌كى دقّتنه حيران اولدم. فقط او تكرار، يالڭز اون طوقوزنجى سوز و مكتوب ايچون صاييلير؛ اوندن صوڭره‌كيلره نسبةً صاييلماز