جلجلوتيه، سريانيجه بديع ديمكدر و بديع معناسنده‌در. عباره‌لرى بديع اولان رسالۀِ النور، جلجلوتيه‌ده مهمّ بر موقع طوتوب أكثر يرلرنده ترشّحاتى گورونديگندن، قصيده‌نڭ إسمى اوڭا باقييور گبى ويريلمش. هم شيمدى آڭلايورم كه؛ أسكيدن بَرى بنم لياقتم اولماديغى حالده بڭا ويريلن بديع الزمان لقبى بنم دگلدى، بلكه رسالۀِ النورڭ معنوى بر إسمى ايدى. ظاهر بر ترجماننه عاريةً و أمانةً طاقيلمش. شيمدى او أمانت إسم، حقيقى صاحبنه إعاده ايديلمش. ديمك، سريانيجه بديع معناسنده و قصيده‌ده تكرّرينه بناءً قصيده‌يه ويريلن جلجلوتيه إسمى إشارى بر طرزده، بدعت زماننده چيقان بديع البيان و بديع الزمان اولان رسالۀِ النورڭ هم عباره، هم معنا، هم إسم نقطه‌لريله بديعلگنه مناسبتدارلغنى إحساس ايتمه‌سنه و بو إسم بر پارچه اوڭا ده باقماسنه؛ بو إسمڭ مسمّاسنده، رسالۀِ النور چوق ير إشغال ايتديگى ايچون، حق قزانمش تخمين ايدييورم. {رَبَّنَا لاَ تُؤَاخِذْنَا اِنْ نَسِينَا اَوْ اَخْطَاْنَا}

سكزنجى رمز: بو رمزڭ بيانندن أوّل أڭ مهمّ ايكى سؤاله جواب يازيله‌جق

برنجى سؤال: بتون قيمتدار كتابلر ايچنده رسالۀِ النور، قرآنڭ إشارتنه و إلتفاتنه و حضرتِ إمامِ على‌نڭ (رض) تقدير و تحسيننه و غوثِ أعظمڭ توجّه و تبشيرينه وجهِ إختصاصى نه‌در؟ او ايكى ذاتڭ كرامتله رسالۀِ النوره بو قدر قيمت و أهمّيت ويرمه‌سنڭ حكمتى نه‌در