ايكنجيسى: حضرتِ إمامِ على (رض) باشده {رُوحِى بِهِ اهْتَدَتْ اِلٰى كَشْفِ اَسْرَارٍ بِبَاطِنِهِ انْطَوَتْ} و اورته‌لرنده {وَاَمْنِحْنِى يَا ذَا الْجَلاَلِ كَرَامَةً ❊ بِاَسْرَارِ عِلْمٍ يَا حَلِيمُ بِكَ انْجَلَتْ} و آخرده {مَقَالُ عَلِىٍّ وَ ابْنِ عَمِّ مُحَمَّدٍ ❊ وَ سِرُّ عُلُومٍ لِلْخَلاَئِقِ جُمِّعَتْ} بر خزينۀِ علوم اولارق گوسترييور. حالبوكه ظاهرنده يالڭز بر مناجاتدر. حتّى إمامِ على‌نڭ (رض) حقيقت‌فشان سائر قصيده‌لرى و علمى باشقه مناجاتلرى گبى، أسرارِ علميه ايله تام مناسبتى گورونمييور. بنم خصوصى قناعتم شودر كه: جلجلوتيه، مادام رسالۀِ النورى ايچنه آلمش و سينه‌سنه باصوب معنوى ولد گبى قبول ايتمش، ألبته {وَ سِرُّ عُلُومٍ لِلْخَلاَئِقِ جُمِّعَتْ} فقره‌سى ايله، كندى خزينه‌سنڭ بر قسم پيرلانطه‌لرينى آخر زمانده نشر ايدن رسالۀِ النورى شاهد گوستروب جلجلوتيه‌يى بر خزينۀِ علوم و بر دفينۀِ علميه‌در دييه بِحقٍّ مدح و ثنا ايده‌بيلير

اوچنجيسى: معلومدر كه، بعضًا غايت كوچك بر أماره، بعض شرائط داخلنده غايت قوّتلى بر دليل حكمنه گچر. يقين درجه‌سنده قناعت ويرر. بڭا بويله قناعت ويرن چوق مثاللرندن يالڭز سابق بيان ايتديگم بر تك مثال بڭا كافى گلييور. شويله كه

حضرتِ إمامِ على (رض) {تُقَادُ سِرَاجُ النُّورِ} فقره‌سيله رسالۀِ النورى تاريخيله و إسميله و ماهيتيله و أساسلريله و خدمتيله و وظيفه‌سيله گوستردكدن صوڭره، سريانيجه إسملرى تعداد ايده‌رك مناجات ايدر. اوتوز ايكى ويا اوتوز اوچ عدد إسملرده ايكى دفعه {بَعْدَهَا} كلمه‌سنى تكرار ايدر. برى، يگرمى يدنجيده {وَ ذَيْمُوخٍ بَعْدَهَا} ديگرى، اوتوز برده {وَ بَازُوخٍ بَعْدَهَا} دير. ايشته رسالۀِ النورڭ سوزلرى اوتوز اوچ و بر جهتده اوتوز ايكى.. و مكتوبات نامنده‌كى رساله‌لرڭ دخى بر جهتده اوتوز ايكى و بر جهتده اوتوز اوچ اولوب بو مناجاتله مطابق اولماسى و يالڭز رساله شكلنده ايكى عدد ذيللرى بولونماسى و او ذيللرڭ بريسى يگرمى يدنجى سوزڭ أهمّيتلى ذيلى و ديگرى اوتوز برنجى سوزڭ قيمتدار ذيلى اولماسى و او ايكى ذيل رساله‌سنڭ مستقل مرتبه و نومرولرى بولونمامسى و {بَعْدَهَا} كلمه‌سى دخى عين يرده، عين معناده توافق ايتمه‌سى بڭا ايكى كرّه ايكى درت ايدر درجه‌سنده قناعت ويرييور كه؛ حضرتِ إمامِ على (رض) تبعى بر معنا ايله و إشارى بر مفهوم ايله رسالۀِ النوره، حتّى ذيللرينه باقمق ايچون اويله ياپمش. داها چوق قرينه‌لر و برر سوزه إشارت ايدن مناسبتلر وار. فقط گيزلى و اينجه اولدقلرندن ذكر ايديلمه‌دى. حاشيه

--------------------------------------------------------------

(حاشيه : مثلا، يگرمى سكزنجى مرتبه‌ده {وَ بِسُورَةِ التَّهْمِيزِ} كلمه‌سيله يگرمى سكزنجى سوزڭ آخرى اولان جهنّم مسئله‌سنڭ چوق قوّتلى بر برهاننه إشارت ايدوب باشده‌كى جنّت مسئله‌سنڭ يالڭز ايكى اوچ سؤال و جوابه دائر بحثى ايسه، باشقه يرده إشارت ايتديگندن مناسبت گيزلنمش. هم مثلا ايكنجى مرتبه‌ده {يٰس} كلمه‌سيله، هم ايكنجى سوزه، هم ايكنجى مكتوبه، هم ايكنجى لمعه‌يه، هم ايكنجى شعاعه باقديغندن مناسبت گنيشلنديگندن گيزلنمش. هم مثلا: {وَ كَافٍ وَ هَا يَاءٍ وَ عَيْنٍ وَ صَادِهَا} يعنى {كهٰيٰعص} بشنجى مرتبه‌ده بولونماسى، هم بشنجى سوزه، هم بشنجى مكتوبه، هم بشنجى لمعه‌يه و دردنجى شعاع اولان آيتِ حسبيه رساله‌سنه، هم اوچنجى شعاع اولان مناجاته باقديغى جهتله مناسبت گنيشلنمش، گيزلنمش. بوڭا باشقه‌لرى قياس ايديلسين