ايشته بو تمثيل گبى، هر وقت گورديگمز أجل دار آغاجنڭ آرقه‌سنده مقدّراتِ نوعِ بشر پيانقوسندن أهلِ ايمان و طاعت ايچون (حسنِ خاتمه شرطيله) أبدى و توكنمز بر خزينه‌نڭ بيلتى چيقه‌جغنى؛ يوزده يوز إحتمال ايله سفاهت و حرام و إعتقادسزلق و فسقده دوام ايدنلر (توبه ايتمه‌مك شرطيله) يا إعدامِ أبدى (آخرته اينانميانلره) ويا دائمى و قراڭلق حپسِ منفرد (بقاءِ روحه اينانان و سفاهتده گيدنلره) و شقاوتِ أبديه إعلامنى آلاجقلرينى يوزده طقسان طوقوز إحتمال ايله قطعى خبر ويرن، باشده أللرنده نشانۀِ تصديق اولان حدسز معجزه‌لر بولونان يوز يگرمى درت بيڭ پيغمبرلر (عليهم السلام) و اونلرڭ ويردكلرى خبرلرڭ ايزلرينى و سينه‌ماده گبى گولگه‌لرينى، كشف ايله، ذوق ايله گوروب تصديق ايده‌رك إمضا باصان يوز يگرمى درت ميليوندن زياده أوليالر (قَدَّسَ اﷲُ اَسْرَارَهُمْ) و او ايكى قسم مشاهيرِ إنسانيه‌نڭ خبرلرينى عقلاً قطعى برهانلرله و قوّتلى حجّتلرله (فكرًا و منطقًا) يقينى بر صورتده إثبات ايده‌رك تصديق ايدوب إمضا باصان ميليارلر گلن گچن محقّقلر، (*) مجتهدلر و صدّيقينلر؛ بِالإجماع، متواترًا نوعِ إنسانڭ گونشلرى، قمرلرى، ييلديزلرى اولان بو اوچ جماعتِ عظيمه و بو اوچ طائفۀِ أهلِ حقيقت و بشرڭ قدسى قوماندانلرى اولان بو اوچ بيوك و عالى هيئتلرڭ فرمانلرى ايله ويردكلرى خبرلرى ديڭله‌مه‌ين و سعادتِ أبديه‌يه گيدن، اونلرڭ گوستردكلرى يول اولان صراطِ مستقيمده گيتمه‌ينلر، يوزده طقسان طوقوز دهشتلى تهلكه إحتمالنى نظره آلميان و بر تك مخبرڭ بر يولده تهلكه وار ديمه‌سيله او يولى بيراقان باشقه اوزون يولده حركت ايدن بر آدم، ألبته و ألبته وضعيتى شودر كه

ايكى يولڭ (حدسز مخبرلرڭ قطعى إخبارلرى ايله) أڭ قيصه و قولايى و يوزده يوز جنّت و سعادتِ أبديه‌يى قزانديرانى بيراقوب أڭ دغدغه‌لى و اوزون و صيقنتيلى و يوزده طقسان طوقوز جهنّم حپسنى و شقاوتِ دائمه‌يى نتيجه ويرن يولنى إختيار ايتديگى حالده، دنياده ايكى يولڭ، بر تك مخبرڭ يالان اولابيلير خبريله يوزده بر تك إحتمال تهلكه و بر آى حپس إمكانى بولونان قيصه يولى بيراقوب، منفعتسز (يالڭز ضررسز اولديغى ايچون) اوزون يولى إختيار ايدن بدبخت، سرخوش ديوانه‌لر گبى دهشتلى و اوزاقده گورونن و اوڭا مسلّط اولان أژدرهالره أهمّيت ويرمز، سينكلرله اوغراشييور، يالڭز اونلره أهمّيت ويرر درجه‌ده عقلنى، قلبنى، روحنى، إنسانيتنى غيب ايتمش اولويور

---------------------------------------------------------------------------------------

*

او محقّقلردن تك بريسى رسالۀِ النوردر. يگرمى سنه‌در أڭ معنّد فيلسوفلرى و متمرّد زنديقلرى صوصديران أجزالرى ميدانده‌در. هركس اوقويه‌بيلير و كيمسه إعتراض ايتمز