ديمك {اَشْهَدُ اَنْ لاَ اِلٰهَ اِلاَّ اﷲ} حقيقتى، بتون حجّتلريله {اَشْهَدُ اَنَّ مُحَمَّدًا رَسُولُ اﷲ} حقيقتنى إثبات ايدر

هم هيچ إمكان وار مى كه؛ بو كائناتڭ صانعى، مخلوقاتنى يوز بيڭ ديللر ايله بربريله قونوشديرسون و اونلرڭ قونوشمالرينى ايشيتسين و بيلسين و كنديسى قونوشماسين؟ حاشا

هم هيچ عقل قبول ايدر مى كه؛ كائناتده‌كى مقاصدِ إلٰهيه‌سنى بر فرمان ايله بيلديرمسين؟ و معمّاسنى آچاجق و مخلوقات نه يردن گلييورلر و نه يره گيده‌جكلر و نه ايچون بويله قافله قافله آرقه‌سنده بورايه گلوب بر پارچه طوروب گچييورلر، دييه اوچ دهشتلى سؤالِ عمومى‌يه حقيقى جواب ويره‌جك قرآن گبى بر كتابى گوندرمسين؟ حاشا

هم هيچ ممكن ميدر كه؛ اون اوچ عصرى ايشيقلانديران و هر ساعتده يوز ميليون لسانلرده كمالِ حرمتله گزن و ميليونلر حافظلرڭ قلبلرنده قدسيتيله يازيلان و نوعِ بشرڭ كيفيةً قسمِ أعظمنى قانونلريله إداره ايدن و نفسلرينى و روحلرينى و قلبلرينى و عقللرينى تربيه و تزكيه و تصفيه و تعليم ايدن و رسالۀِ نورده قرق وجهِ إعجازى إثبات ايديلن و قرق طائفه و طبقۀِ ناسه و هر بر طبقه‌يه قارشى بر نوع إعجازينى گوسترديگى كرامتلى و خارقه‌لى اون طوقوزنجى مكتوبده بيان اولونان و محمّد عليه الصلاة والسلام بيڭ معجزاتيله اونڭ بر معجزه‌سى اولارق حق كلام اﷲ اولديغى قطعى إثبات ايديلن قرآنِ معجز البيان هيچ بر جهتده إمكانى وار مى كه، او متكلّمِ أزلى و او صانعِ سرمدينڭ كلامى و فرمانى اولماسين؟ حاشا، يوز بيڭ دفعه حاشا و كلا