ديمك ايمانِ بِاﷲ بتون حجّتلريله، قرآنڭ كلام اﷲ اولديغنى إثبات ايدييور

هم هيچ ممكن ميدر كه؛ زمينڭ يوزينى متماديًا ذى‌حياتلرله طولديروب بوشالتان و كندينى طانيتديرمق و عبادت و تسبيحات ايتديرمك ايچون بو دنيامزى ذى‌شعورلرله شنلنديرن بر سلطانِ ذو الجلال، سماواتى و ييلديزلرى بوش و خالى بيراقسين؛ اونلره مناسب أهالى‌يى ياراتوب، او سماوى سرايلرده إسكان ايتمه‌سين و سلطنتِ ربوبيتنى أڭ بيوك مملكتنده خَدَمه‌سز، حشمتسز، مأمورسز، ألچيسز، يَاوَرْسز، ناظرسز، سيرجيسز، عابدسز، رعيتسز بيراقسين؟ حاشا، مَلكلر صاييسنجه حاشا

هم هيچ بر جهتده إمكانى وار مى كه؛ بو كائناتى اويله بر كتاب طرزنده يازار كه، هر بر آغاجڭ بتون تاريخچۀِ حياتنى بتون چكردكلرنده قيد ايدن و هر بر اوتڭ و چيچگڭ بتون وظيفۀِ حياتيه‌سنى بتون تخملرنده يازان و هر بر ذى‌شعورڭ بتون سرگذشتۀِ حياتيه‌سنى خردل گبى كوچك قوّۀِ حافظه‌سنده غايت مكمّل يازديران و بتون ملكنده و دوائرِ سلطنتنده هر عملى و هر حادثه‌يى متعدّد فوطوغرافلرله آلارق محافظه ايدن و ربوبيتڭ أڭ أهمّيتلى بر أساسى اولان عدالت، حكمت و رحمتڭ تجلّيلرى و تحقّقلرى ايچون قوجه جنّت و جهنّمى و صراط و ميزانِ أكبرى يارادان بر حاكمِ حكيم و بر عليمِ رحيم، إنسانلرڭ كائناتى علاقه‌دار ايدن عمللرينى يازديرماسين و مجازات و مكافات ايچون فعللرينى قيد ايتديرمه‌سين و سيّئات و حسناتلرينى قدرڭ لوحه‌لرنده يازماسين؟ حاشا، قدرڭ لوحِ محفوظنده يازيلان حرفلرى عددنجه حاشا