(ميوه‌نڭ اون برنجى مسئله‌سنڭ باشى؛ بر ميوه‌سى جنّت و برى سعادتِ أبديه و برى رؤيت اﷲ اولان ايمان شجرۀِ قدسيه‌سنڭ حدسز، كلّى و جزئى ميوه‌لرندن يوزر نمونه‌لرى رسالۀِ النورده بيان و حجّتلرله إثبات ايديلديگندن، ايضاحنى ”سراج النور“ه حواله ايدوب؛ كلّى أركاننڭ دگل، بلكه جزئى و جزءلرڭ، جزئى و خصوصى ميوه‌لرندن بر قاچ نمونه بيان ايديله‌جك

بريسى: بر گون بر دعاده، ”يا ربّى! جبرائيل، ميكائيل، إسرافيل، عزرائيل حرمتلرينه و شفاعتلرينه، بنى جنّ و إنسڭ شرلرندن محافظه أيله!“ مئالنده دعايى ديديگم زمان، هركسى تيتره‌تن و دهشت ويرن عزرائيل نامنى ذكر ايتديگم وقت غايت طاتلى و تسلّيدار و سَويملى بر حالت حسّ ايتدم. الحمد ِﷲ ديدم. عزرائيلى جدًّا سومگه باشلادم. ملائكه‌يه ايمان ركننڭ بو جزئى فردينڭ پك چوق ميوه‌لرندن يالڭز بر جزئى ميوه‌سنه غايت قيصه بر إشارت ايدرز

بريسى: إنسانڭ أڭ قيمتلى و اوستنده تيتره‌ديگى مالى، اونڭ روحيدر. اونى ضايع اولمقدن و فنادن و باشى بوشلقدن محافظه ايتمك ايچون قوّتلى و أمين بر أله تسليمڭ درين بر سَوينج ويرديگنى قطعى حسّ ايتدم. و إنسانڭ عملنى يازان مَلكلر خاطريمه گلدى. باقدم، عينًا بو ميوه گبى چوق طاتلى ميوه‌لرى وار

بريسى: هر إنسان قيمتلى بر سوزينى و فعلنى باقيلشديرمك ايچون إشتياقله كتابت و شعر، حتّى سينه‌ما ايله حفظنه چاليشير. خصوصًا او فعللرڭ جنّتده باقى ميوه‌لرى بولونسه، داها زياده مراق ايدر. ”كِرَامًا كَاتِبِين“ إنسانڭ اوموزلرنده طوروب اونلرى أبدى منظره‌لرده گوسترمك و صاحبلرينه دائمى مكافات قزانديرمق، او قدر بڭا شيرين گلدى كه تعريف ايده‌مم