ايكى گون أوّل صورغو حاكمى بنى چاغيرديغى وقت، بن قارداشلريمى ناصل مدافعه ايده‌يم دييه دوشونوركن، إمامِ غزالينڭ ”حزب المصون“نى آچدم. بردن بو آيتلر نظرمه گوروندى

باقدم كه: برنجى آيت، (شدّه‌لر صاييلسه و مدّه‌لر صاييلمازسه، {اٰمَنُوا} ده‌كى ”واو“ دخى مدّه‌در) مقامِ جفريسى و أبجديسى بيڭ اوچيوز آلتمش ايكى (١٣٦٢) ايدر كه، تام تامنه بو سنه‌نڭ عين تاريخنه و بزم مؤمن قارداشلريمزى مدافعه‌يه عزم ايتديگمز زمانه، هم معناسى، هم مقامى توافق ايدييور. الحمد ِﷲ ديدم، بنم مدافعه‌مه إحتياج بيراقمييور. صوڭره خاطريمه گلدى كه: ”عجبا نتيجه نه اولاجق؟“ دييه مراق ايتدم. گوردم: {اَﷲُ حَفِيظٌ عَلَيْهِمْ ❊ طُوبٰى لَهُمْ} ده‌كى ايكى جمله، تنوين صاييلمق شرطيله، مقامِ جفريسى عينًا بيڭ اوچيوز آلتمش ايكى، (أگر بر مد صاييلمازسه، ايكى؛ أگر صاييلسه، اوچ ايدر) تام تامنه حفظِ إلٰهيه‌يه پك چوق محتاج اولديغمز بو زمانڭ، بو سنه‌نڭ و گله‌جك سنه‌نڭ عين تاريخنه توافق ايده‌رك، بر سنه‌دن بَرى بيوك بر دائره‌ده و گنيش بر ساحه‌ده عليهمزه إحضار ايديلن دهشتلى بر هجوم قارشيسنده محفوظيتمزه تأمينات ايله تسلّى ويرييور

رسالۀِ نور بو حادثه‌ده داها پارلاق فتوحاتى حاكم دائره‌لرده بولونماسندن شيمديكى موقّت توقّف بزى مأيوس ايتمز و ايتمه‌ملى. و آيت الكبرانڭ طبعى سببيله مصادره‌سى، اونڭ پارلاق مقامنه نظرِ دقّتى هر طرفدن اوڭا جلب ايتمه‌سنه بر إعلاننامه تلقّى ايدييورم