سزه أوّلكى گون ايكى قيمتلى قزانجمزى يازمشدم. ايكنجيده يوزر لسانله دعا و تسبيحات، إلى آخر ديمشدم. نقصان وار. صحيحى: هر بريمز درجه‌سنه گوره يوزر لسانله، إلى آخر

هم بن پك چوق علاقه‌دار اولديغم صاوه كويندن چوق محترم بر إختيار ايله أللريمز بربريله كلبچه ايديلوب گلديگمز، بنى پك چوق ممنون ايدوب، بونڭله او مبارك كويڭ بڭا شدّتِ علاقه‌سنى آڭلادم. او قارداشمه آيريجه سلام ايدرم

عزيز قارداشم

{وَخَسِرَ هُنَالِكَ الْكَافِرُونَ} بو آيت دخى {وَ الْعَصْرِ اِنَّ اْلاِنْسَانَ لَفِى خُسْرٍ} إشارتنه إشارت ايدر كه؛ كافرلرڭ بو قدر تخريباتلرى و حربلرى فائده‌سز و خسارت ايچريسنده عينِ ضرر اولدى. {وَ الْعَصْرِ} إشارتنده رسالۀِ نوره بر ايما بولونماسى رمزيله، بو آيت دخى رمزًا بيڭ اوچيوز آلتمش (١٣٦٠) رومى تاريخى اولان بو سنه‌ده منافقلر و كفره دوشنلر رسالۀِ نوره ايليشه‌جكلر، فقط خسارت ايدرلر. چونكه زلزله و حرب گبى بلالرڭ رفعنه بر سبب رسالۀِ نوردر. اونڭ تعطيلى بلالرى جلب ايدر دييه بر گيزلى ايما اولابيلير