ايشته بديع الزمانڭ اوزون سنه‌لردن بَرى ”زنديقلر رسالۀِ نوره طوقونماسينلر و شاكردلرينه ايليشمه‌سينلر. أگر طوقونورلرسه و ايليشيرلرسه ياقيننده بكله‌ين فلاكتلر، اونلرى يوز دفعه پشيمان ايده‌جك.“ دييه رسالۀِ نور ايله خبر ويرديگى يوزلر حادثات ايچنده ايشته زلزله أليله طوغريلغنى إمضا ايده‌رك گلن درت حقيقتلى فلاكت داها... جنابِ حق بزه و رسالۀِ نوره تعرّض ايدنلرڭ قلبلرينه ايمان، باشلرينه حقيقتى گوره‌جك عقل إحسان ايتسين. بزى بو زندانلردن، اونلرى ده بو فلاكتلردن قورتارسين، آمين

عزيز، صدّيق قارداشلرم و مصيبت آرقداشلرم

سزڭ ايچڭزده مبارك عالملر و عالى‌جناب مدبّرلر و خالص فداكار شاكردلر بولونماسندن بيوك بر إعتماد ايله سزه گووه‌نييوردم كه؛ قوّتلى و دسّاس و كثرتلى دشمنلريمزه قارشى وحدتڭزى و تسانديڭزى محافظه ايده‌جكسڭز دييه إستراحت ايدردم، سزڭ ايله مشغول اولمازدم. بر قاچ نقطه‌يى بيان ايتمك لزوم اولدى

برنجيسى: تخليه‌ڭز اوزامامق ايچون بن، آنقره‌يه بر شى گوندروب مراجعت ايتميه‌جكدم. فقط محكمه، محرم و غيرِ محرم رساله‌لرى و أسكى و يڭى مكتوبلرى قاريشديرارق آنقره‌يه گوندرديگندن، مجبوريتله بوراده‌كى أهلِ وقوف گبى محرم رساله‌لرى أساس ايده‌رك اوراده‌كى أهلِ وقوف عليهمزه حكم ايتمه‌مك ايچون محرملره، خصوصًا بشنجى شعاعڭ سفيان و إسلام دجّالى حقّنده غايت قوّتلى جواب ويرن مدافعات رساله‌سنى و فلسفۀِ طبيعيه‌نڭ ويرديگى كفرِ مغرورانه‌يى و ايمان عليهنده جرئتكارانه تجاوزينى قيران ميوه رساله‌سنى او مقاماته گوندرمك ضرورى و لازم ايدى