(گوزل و تام يرنده بر تعزيه‌نامه

عزيز، صدّيق قارداشلرم

{لِكُلِّ مُصِيبَةٍ اِنَّا ِﷲِ وَاِنَّا اِلَيْهِ رَاجِعُونَ} بن هم كنديمى، هم سزى، هم رسالۀِ نورى تعزيه و مرحوم حافظ على‌يى و دڭزلى مزارستاننى تبريك ايدييورم. ميوه رساله‌سنڭ حقيقتنى علم اليقين ايله بيلن بو قهرمان قارداشمز، عين اليقين و حقّ اليقين مقامنه چيقمق ايچون، قبره جسدينى بيراقوب مَلكلر گبى ييلديزلرده، عالمِ أرواحده سياحته گيتدى و تام وظيفه‌سنى ياپوب ترخيصله إستراحته چكيلدى. جنابِ أرحم الراحمين، رسالۀِ نورڭ بتون يازيلان و اوقونان حرفلرى عددنجه دفترِ أعمالنه حسنات يازديرسين. آمين! و اونلرڭ صاييسنجه اونڭ روحنه رحمتلر ياغديرسين، آمين! و قبرنده قرآنى، رسالۀِ نورى اوڭا شيرين و أنيس آرقداش أيله‌سين. آمين! و نور فابريقه‌سنه اونڭ يرينه اون قهرمانى إحسان ايدوب چاليشديرسين. آمين! آمين! آمين! سز دخى بنم گبى دعالريڭزده اونى ياد ايديڭز. بيڭ لسان اونڭ لسانى يرينه إستعمال ايدوب، او غيب ايتديگى بر حيات و بر ديل يرنده معنوى بيڭ حيات قزاندى دييه رحمتِ إلٰهيه‌دن اميدوارز