عزيز، صدّيق قارداشلرم

بربريڭزى أنانيتله ويا صداقتسزلكله إتهام ايتمه‌مك ايچون، بر حقيقتى بيان ايتمك إخطار ايديلدى

بن بر زمان أنانيتنى بيراقمش و نفسِ أمّاره‌سى قالمامش بيوك أوليادن شدّتلى بر صورتده نفسِ أمّاره‌دن شكايت ايتدكلرينى گوردم، حيرتده قالدم. صوڭره قطعى بيلدم كه، آخر عمره قدر مجاهدۀِ نفسيه‌نڭ ثوابدار دوامى ايچون نفسِ أمّاره‌نڭ ئولمسى اوزرينه اونڭ جهازاتى طمارلره و حسّياته دور ايديلير، مجاهده دوام ايدر. ايشته او بيوك أوليالر، بو ايكنجى دشمندن و نفسڭ وارثندن شكايت ايدرلر. هم معنوى قيمت و مقام و مزيت، بو دنيايه باقمييور كه، كندينى إحساس ايتسين. حتّى أڭ بيوك مقامده بولونانلردن بعض ذاتلره ويريلن بيوك بر إحسانِ إلٰهى‌يى حسّ ايتمدكلرندن، كنديلرينى هركسدن زياده بيچاره و مفلس تلقّى ايتمه‌لرى گوسترييور كه؛ عوامڭ نظرنده مدارِ كمالات ظن ايديلن كشف و كرامات و أذواق و أنوار، او معنوى قيمت و مقاملره مدار و مِحك اولاماز. صحابه‌لرڭ بر ساعتى، باشقه وليلرڭ بر گون، بلكه بر چلّه‌سى قدر قيمتى اولديغى حالده؛ كشف و معنوى خارق العاده حالاته أوليا گبى مظهريتلرى هر صحابه‌ده اولمامسى، بو حقيقتى إثبات ايدييور

ايشته قارداشلرم! دقّت ايديڭز؛ سزڭ نفسِ أمّاره‌ڭز، قياسِ بِالنفس جهتنده، سوءِ ظن و غرور نقطه‌سنده سزى آلداتماسين؛ رسالۀِ النور تربيه ايتمييور دييه شبهه‌لنديرمه‌سين