عزيز، صدّيق قارداشلرم

بو نوع حديثلر، متشابه قسمندندرلر. هم جزئى و خصوصى دگللر، عموم يرلره باقمييورلر. بو رقم ايسه، امّتنڭ باشنه گلن دينى فتنه‌لردن يالڭز بر تك زمانى و حجاز و عراقى مثال اولارق گوسترر. ذاتًا عبّاسيلرڭ زماننده، او تاريخده معتزله، رافضى، جبرى و پرده آلتنده زنديقلر، ملحدلر، إسلاميتى زده‌له‌ين چوق فِرَقِ ضالّه ميدانه گلمشديلر. شريعت و إعتقاد نقطه‌سنده أهمّيتلى صارصينتيلر اولماسى هنگامنده، بخارى، مسلم، إمامِ أعظم، إمامِ شافعى، إمامِ مالك، إمامِ أحمد ابن حنبل و إمامِ غزالى و غوثِ أعظم و جنيدِ بغدادى گبى پك چوق أعاظمِ إسلاميه إمداده يتيشوب او فتنۀِ دينيه‌يى مغلوب ايتديلر. او تاريخدن اوچ يوز سنه صوڭره‌يه قدر او غلبه دوام ايله برابر، پرده آلتنده ينه او أهلِ ضلالت فرقه‌لرى، سياست يوليله هلاكو جنگيز فتنه‌سنى إسلاملرڭ باشنه گتيرديلر. بو فتنه‌دن هم حديث، هم حضرتِ على رضى اﷲ عنه صريح بر صورتده عين تاريخيله إشارت ايدييورلر. صوڭره بو زمانمزڭ فتنه‌سى أڭ بيوك بر فتنه اولديغندن، هم متعدّد حديثلر، هم چوق إشاراتِ قرآنيه عين تاريخيله خبر ويرييورلر. بوڭا قياسًا، اُمّتڭ گچيره‌جگى صفحاتى كلّى بر صورتده بر حديث بيان ايتديگى وقت، بعضًا او كلّينڭ بر تك حادثه‌سنى، مثال اولارق تاريخى گوسترر. بويله متشابه و معناسى تمام آڭلاشيلميان حديثلرڭ رسالۀِ نور أجزالرى قطعى بر صورتده تأويللرينى بيان ايتمش. يگرمى دردنجى سوزده و بشنجى شعاعده، بو حقيقتى دستورلرله بيان ايتمش