(آشاغيده يازيلان فقره‌لرڭ مقدّمه‌سيدر

محكمۀِ تمييزڭ لهمزده اولارق عليهمزده‌كى آفيون قرارنامه‌سنى حقلى و حقيقتلى دليللر ايله بوزماسنه بر جزئى يارديم ايتمك فكريله، قرارنامه‌ده اولان سهولردن بر قسمنه قيصه إشارتلر ايچون، آشاغيده اونلرڭ محرم رساله‌لردن صوچ موضوعى دييه ذكر ايتدكلرى فقره‌لرى عينًا قيد ايدوب ياڭليشلرينى گوستره‌رك بزى محكوم ايدنلرى مسئول ايدرز

أزجمله: بنى شدّتلى جزا ايله محكوم ايتمك ايچون بتون صوچلريمڭ فهرسته‌سى اولارق قرارڭ آخرنده يازمشلر كه: ”سعيد النورسى‌نڭ ردّ ايتديگى مادّه‌لر برى: ”سلطنت و خلافتڭ إلغاسى.“ هم خطا، هم سهودر. چونكه إختيار لمعه‌سنده ”خلافت سلطنتنڭ وفاتى بنى محزون أيلدى.“ دييه يازديغمى اون بش سنه أوّل أسكيشهر محكمه‌سنه جواب ويردم، صوصديلر. مرورِ زمانه اوغرامش، عفو قانونى و برائت گورمش أهمّيتسز بر خاطره‌يى صوچ صايان، كنديسى صوچلى اولور

هم بو موهوم صوچه بر سند دييه، بنم بر لمعه‌ده و معجزاتِ أحمديه‌ده (ع‌ص‌م) بر حديثِ شريفده: {اِنَّ الْخِلاَفَةَ بَعْدِى ثَلاَثُونَ سَنَةً ثُمَّ تَكُونُ مُلْكًا عَضُوضًا وَفَسَادًا وَجَبَرُوتًا} يعنى، خلفاءِ راشديندن صوڭره بر فساد اولاجق. ايشته بو حديث اوچ معجزۀِ غيبيه‌يى گوسترديگنى بر أسكى رساله‌مده يازمشدم. قرارنامه بنم بر صوچم اولارق، سعيد بر رساله‌ده ديمش: ”خلافتدن صوڭره جبروت و فساد اولاجق.“ أى سطحى هيئت! بر إشارتِ غيبيه‌ده بو زمانمزده مادّى و معنوى أڭ بيوك بر فسادِ بشرى‌يى و زمينى زير و زبر ايدن بر حادثه‌يى خبر ويرن بر حديثڭ إعجازينى بيان ايتمه‌گى صوچ صايان، مادّةً و معنًا صوچليدر