دردنجيسى: شاپقه گيمه‌ديگمى محكوميتمه أهمّيتلى بر سبب گوسترملريدر. بنى قونوشديرمديلر. يوقسه بنى جزالانديرمغه چاليشانلره دييه‌جكدم كه: اوچ آى قسطمونيده پوليسلر و قوميسر قره‌غولنده مسافر قالدم. هيچ بر وقت بڭا ديمه‌ديلر: ”شاپقه‌يى باشڭه قوى.“ و اوچ محكمه‌ده شاپقه‌يى باشمه قويماديغم و باشمى محكمه‌ده آچماديغم حالده بڭا ايليشمدكلرى و يگرمى اوچ سنه بعض دينسز ظالملرڭ او بهانه ايله بڭا غيرِ رسمى چوق صيقنتيلى و آغير بر نوع جزا چكديردكلرى و چوجقلر و قادينلر و أكثرى كويليلر و دائره‌لرده مأمورلر و بره گينلر شاپقه گيمگه مجبور اولمادقلرى و هيچ بر مادّى مصلحت گيمسنده بولونمديغى حالده، بنم گبى بر منزوى، بتون مجتهدلرڭ و عموم شيخ الإسلاملرڭ ياساق ايتدكلرى بر سرپوشى گيمديگم بهانه‌سيله و اويدورمالر علاوه‌سيله يگرمى سنه جزاسنى چكديگم و لباسه عائد، معناسز بر عادتله تكرار بنى جزالانديرمغه چاليشان و چارشوده، رمضانده، گوندوزده راقى ايچوب نماز قيلميانلرى حرّيتِ شخصيه وار دييه، كندينه قياس ايدوب ايليشمديگى حالده، بو درجه شدّت و تكرارله و إصرارله بنى قيافتم ايچون صوچلانديرمغه چاليشان؛ ألبته ئولومڭ إعدامِ أبديسنى و قبرڭ دائمى حپسِ منفردينى گوردكدن صوڭره محكمۀِ كبراده اوندن بو خطاسى صوريلاجق

بشنجيسى: اوتوز اوچ آياتِ قرآنيه‌نڭ تحسينكارانه إشارتنه مظهريتى و إمامِ على (كرّم اﷲُ وجهه) و غوثِ أعظم (قُدِّسَ سِرُّهُ) گبى أوليانڭ تقديرلرينى و يوز بيڭ أهلِ ايمانڭ تصديقلرينى و يگرمى سنه‌ده ملّته، وطنه ضررسز پك چوق منفعتلى بر مرتبه‌يى قزانديران رسالۀِ نورى، سينك قنادى گبى بهانه‌لرله، بعض رساله‌لرينڭ مصادره‌سنه حتّى درت يوز صحيفه و يوز بيڭ آدمڭ ايمانلرينى قورتاران و قوّتلنديرن ”ذو الفقار معجزاتِ أحمديه“ مجموعه‌سنى، أسكيدن يازيلمش و مرورِ زمان و عفو قانونلرى گورمش ايكى آيتڭ تام حقلى تفسيرينه دائر ايكى صحيفه‌يى بهانه ايده‌رك، او پك چوق منفعتلى و قيمتدار مجموعه‌نڭ مصادره‌سنه سبب اولدقلرى گبى، شيمدى ده نورڭ قيمتدار رساله‌لرينى، هر بريسنده بيڭ كلمه ايچنده بر ايكى كلمه‌يه ياڭليش معنا ويرمكله، او بيڭ منفعتلى رساله‌نڭ مصادره‌سنه چاليشيلديغنى، بو اوچنجى إدّعانامه‌يى ايشيدن و نشر ايتديگمز قرارنامه‌يى گورن تصديق ايدر. بز دخى: {لِكُلِّ مُصِيبَةٍ اِنَّا ِﷲِ وَ اِنَّا اِلَيْهِ رَاجِعُونَ ❊ حَسْبُنَا اﷲُ وَنِعْمَ الْوَكِيلُ} ديرز