سكزنجيسى: بشنجى شعاع، ايكى سنه دڭزلى و آنقره محكمه‌لرينڭ أللرنده قالوب صوڭره بزه إعاده ايتدكلرندن، دڭزلى محكمه‌سنده برائتمزى نتيجه ويرن مدافعاتمله برابر سراج النور إسمنده‌كى بيوك مجموعه‌نڭ آخرنده يازيلمش. گرچه أوّلجه محرم طوتويوردق، فقط مادام محكمه‌لر اونى تشهير ايدوب برائتله بزه إعاده ايتديلر. ديمك بر ضررى يوقدر دييه تكثيرينه إذن ويردم. و او بشنجى شعاعڭ أصلى، اوتوز قرق سنه أوّل يازيلمش متشابه حديثلردر. فقط امّتده أسكيدن بَرى إنتشار ايدن بر قسمنه گرچه بعض أهلِ حديث بر ضعفيت إسناد ايتمشلر، فقط ظاهرى معنالرى مدارِ إعتراض اولماسندن، صِرف أهلِ ايمانى شبهه‌لردن قورتارمق ايچون يازيلديغى حالده، بر زمان صوڭره اونڭ خارقه تأويللرينڭ بر قسمى گوزلره گورونديگى ايچون بز اونى محرم طوتدق؛ تا ياڭليش معنا ويريلمه‌سين. صوڭره متعدّد محكمه‌لر اونى تدقيق ايدوب تشهيرينه سبب اولمقله برابر، بزه إعاده ايتدكلرى حالده، شيمدى بنى تكرار اونڭله صوچلى ياپمق نه قدر عدالتدن، حقدن، إنصافدن اوزاق اولديغنى، بزى قناعتِ وجدانيه ايله محكوم ايدنلرڭ وجدانلرينه و اونلرى دخى محكمۀِ كبرايه حواله ايده‌رك {حَسْبُنَا اﷲُ وَنِعْمَ الْوَكِيلُ} ديرز

طوقوزنجيسى: چوق مهمدر. فقط بزى محكوم ايدنلرڭ، رسالۀِ نورى مطالعه‌لرينڭ خاطرى ايچون، اونلرى قيزديرمامق فكريله يازمادم

اوننجيسى: قوّتلى و أهمّيتليدر. فقط ينه اونلرى كوسديرممك نيّتيله شيمديلك يازمادم

تجريدِ مطلقده موقوف