ايكى مكتبِ مصيبت شهادتنامه‌سى نامنده‌كى مطبوع أسكى مدافعاتمى گورنلرڭ تصديقيله؛ ٣١ مارت حادثه‌سنده، بر نطق ايله، عصيان ايتمش سكز طابورى إطاعته گتيرن و بر زمان غزته‌لرڭ يازدقلرى گبى، إستقلال حربنده خطواتِ ستّه نامنده بر مقاله ايله إستانبولده‌كى أفكارِ علمايى إنگليز عليهنه چويروب حركاتِ ملّيه لهنده أهمّيتلى خدمت ايدن و آياصوفياده بيڭلر آدمه نطقنى ديڭلتديرن و آنقره‌ده‌كى مجلسِ مبعوثانڭ شدّتلى آلقيشلاماسيله قارشيلانان و يوز أللى بيڭ بانقنوط (يوز آلتمش اوچ مبعوثڭ إمضاسيله) مدرسه و دار الفنوننه تخصيصاتى قبول ايتديرن و رئيسِ جمهورڭ حدّتنه قارشى ديوانِ رياستده كمالِ متانتله فتور گتيرميه‌رك مقابله ايدوب نمازه دعوت ايدن و دار الحكمة الإسلاميه‌ده حكومتِ إتّحاديه‌نڭ إتّفاقيله حكمتِ إسلاميه‌يى آوروپا حكماسنه تأثيرلى بر صورتده قبول ايتديرمك وظيفه‌سنه لايق گورونن و جبهۀِ حربده يازديغى و شيمدى مصادره ايديلن إشارات الإعجاز، او زمانڭ باش قوماندانى اولان أنور پاشايه او درجه قيمتدار گورونمش كه، كيمسه‌يه ياپمديغى بر حرمتله إستقبالنه قوشديغى او يادگارِ حربڭ خيرينه، شرفنه حصّه‌دار اولمق فكريله، إشارات الإعجازڭ طبعى ايچون كاغدينى ويره‌رك مؤلّفنڭ حربده‌كى مجاهداتى تقديركارانه ياد ايديلن بر آدم؛ بويله عادى بر بَيْگير خيرسزى وياخود قيز قاچيريجى و بر يانكسيجى گبى أڭ آشاغى بر جنايتله كندينى بولاشديروب عزّتِ علميه‌سنى و قدسيتِ خدمتنى و قيمتدار بيڭلر دوستلرينى رذيل ايدوب سقوط ايده‌مز كه، سز اونى بر سنه‌لك جزا ايله محكوم ايدوب عادى بر كچى، قويون خيرسزى گبى معامله ايده‌سڭز... و سببسز اون سنه صيقنتيلى بر ترصّد ايله تعذيب ايتدكدن صوڭره شيمدى ده بر سنه حپس ايله برابر بر سنه ده نظارت آلتنده طوتمق صورتيله، (پادشاهڭ تحكّمنى قالديره‌مديغى حالده) غرضكار بر خفيه‌نڭ ويا عادى بر پوليسڭ تحكّمى آلتنده عذاب ويرمكدن ايسه، إعدام ايديلمه‌سنى داها أولٰى گورور. أگر بويله بر آدم دنيايه قاريشسه ايدى و قاريشمغه آرزوسى اولسه ايدى و خدمتِ قدسيه‌سى مساعده ايتسه ايدى، منمن حادثه‌سنڭ و شيخ سعيد واقعه‌سنڭ اونر مِثلى اولاجق بر طرزده قاريشيردى. دنيايه ايشيتديره‌جك بر طوپ صداسى، بر سينك صداسنه اينميه‌جكدى