عزيز، صدّيق قارداشلرم

أهلِ دنيا بر سياستده و بر صنعتده و بر وظيفه‌ده، يا بر حياتِ إجتماعيه‌يه عائد بر خدمتده و خصوصى بر نوع تجارتده بولونان هر بر طائفه‌نڭ بر نوع قونغره‌ده طوپلانماسى و مذاكره‌سى گبى؛ ايمانِ تحقيقى خدمتِ قدسيه‌سنده بولونان نور طلبه‌لرى دخى قدرِ إلٰهينڭ أمريله و عنايتِ ربّانيه‌نڭ تنسيبى و سَوقيله بو مدرسۀِ يوسفيه قونغره‌سنه گلمه‌سنده إن شاء اﷲ پك چوق قيمتدار معنوى فائده و أهمّيتلى نتيجه‌لر إحسان ايديله‌جك و نورڭ أركانلرى هر برى بر ألف گبى تك باشنه بر يرده بر قيمتى وارسه، بر ألف اوچ ألفله اوموز اوموزه گلوب حالاً گوروشسه بيڭ يوز اونبر اولماسى گبى، بو إجتماعده قيمتى و إن شاء اﷲ قدسى خدمتى و ثوابى بيڭ اولور.. او ألف اَلْفٌ اولور.

بِاسْمِهِ سُبْحَانَهُ

عزيز، صدّيق قارداشلرم

بوگون بنم پنجره‌لريمى ميخلامالرينڭ سببى، محبوسلرله معارفه و سلاملاشمامقدر. ظاهرده باشقه بهانه گوسترديلر. هيچ مراق ايتمه‌يڭز. بِالعكس بنم أهمّيتسز شخصم ايله مشغول اولوب نورلره و طلبه‌لرينه چوق صيقنتى ويرمدكلرندن، بنى جدًّا و قلبًا اونلرڭ شخصى إهانتلر و إشكنجه‌لرله تعذيب ايتمه‌لرى، نورلرڭ و سزلرڭ بدلنه اولديغى و بر درجه نورلره ايليشمه‌ملرى جهتنده ممنونم و صبر ايچنده شكر ايدرم، مراق ايتمييورم. سز دخى هيچ متأثّر اولمايڭز. گيزلى دشمنلريمز مأمورلرڭ نظرِ دقّتنى شخصمه چويرمه‌سندن، نورلرڭ و طلبه‌لرينڭ سلامت و مصلحتلرى نقطه‌سنده بر عنايت و بر خير وار دييه قناعتم وار. بعض قارداشلريمز حدّت ايدوب طوقوناقلى قونوشماسينلر، هم إحتياطله حركت ايتسينلر و تلاش ايتمه‌سينلر، هم هركسه بو مسئله‌دن بحث آچماسينلر. چونكه صافدل قارداشلريمز و إحتياطه داها آليشميان يڭى قارداشلريمزڭ سوزلرندن معنا چيقاران جاسوسلر بولونور. حبّه‌يى قبّه ياپار، إخبار ايده‌بيلير. شيمدى وضعيتمز شاقا قالديرمييور. بونڭله برابر هيچ أنديشه ايتمه‌يڭز. بز عنايتِ إلٰهيه آلتنده‌يز و بتون مشقّتلره قارشى كمالِ صبرله بلكه شكر ايله مقابله ايتمگه عزم ايتمشز. بر درهم زحمت، بر بطمان رحمت و ثوابى نتيجه ويرديگندن، شكر ايتمگه مكلّفز