عزيز، صدّيق، صارصيلماز قارداشلرم!

أوّلا: {اَلْخَيْرُ فِىمَا اخْتَارَهُ اﷲُ} سرّنجه مسئله‌مزڭ تأخيرنده خير وار. قلبم و نورلرڭ سربستيتى اويله ايسته‌يوردى. سز هم بربريڭزى تسلّى، هم قوّۀِ معنويه‌يى تقويه، هم طاتلى صحبتله مذاكرۀِ علميه، هم نورلرڭ يازماسى و مطالعه‌لريله بو گچيجى زحمتڭ نقطه‌سنى سيله‌ر رحمت ياپمغه، بو فانى ساعتلرى باقى ساعتلره چويرمگه موفّق اولورسڭز إن شاء اﷲ.

ثانيًا: مادام بايراملاشمامز محكمه‌نڭ موقّت حپس منزلنده اولدى، بن ده بايرام طاتليسى اولارق؛ قونيه قهرمانى زبيرڭ بڭا گتيرديگى زمزم ايله نورس قريه‌سنڭ بنجه چوق معنيدار بالنى گوندردم. سز بال مطره‌سنه صو قويڭ، قاريشديريڭز. صوڭره زمزمى ايچنه بيراقڭز، كمالِ عافيتله ايچيڭز

عزيز، صدّيق قارداشلرم!

أهمّيتلى بر طرفدن، أهمّيتلى و معنيدار بر سؤال ايديلمش. بڭا صورديلر كه: ”سزڭ جمعيت اولماديغڭز، اوچ محكمه او جهتده برائت ويرمسيله و يگرمى سنه‌دن بَرى ترصّد و نظارت ايدن آلتى ولايتڭ او نقطه‌دن ايليشمه‌ملريله تحقّق ايتديگى حالده، نورجيلرده اويله خارقه بر علاقه وار كه هيچ بر جمعيتده، هيچ بر قوميته‌ده يوقدر. بو مشكلى حلّ ايتمه‌ڭزى ايسترز.“ ديديلر