(زبيرڭ مدافعه‌سيدر)

آفيون آغير جزا حاكملگنه

گيزلى جمعيت قورمق و دولتڭ أمنيتنى بوزمق صوچيله متّهم بولونمقده‌يم. آشاغيده عرض ايده‌جگم وجهله بويله بر صوچى ايشله‌مديگمه قطعى قناعتڭز گله‌جگى ايچون بو إتهامى داها شيمديدن ردّ ايدييورم. أوت رسالۀِ نور طلبه‌سى اولديغمى ممنونيتله و إعلان ايدرجه‌سنه سويله‌يه‌بيليرم. إنكار ايتمك، رسالۀِ نورڭ بڭا ويرديگى فضيلت درسلريله ضد اولديغى ايچون، بو جُرمى ايشله‌مم. رسالۀِ نورڭ اوقويوجيسى اولان بر كيمسه، اوقوديغنى گيزله‌يه‌مز. بِالعكس إفتخارله بِلا پروا سويله‌مكدن چكينمز. زيرا چكينگنلگى ايجاب ايتديره‌جك هيچ بر جمله‌سى ويا كلمه‌سى يوقدر

رسالۀِ نورڭ قيمتنى قرق أللى صحيفه‌لك بر فورماده بليرتمگه چاليشمشدم. مدح ايتدم دييه‌مم، چونكه: كائناتڭ گونشى و عقلى اولان و بيڭ اوچ يوز كسور سنه‌دن بَرى بشريتى تنوير و إرشاد ايدن قرآنِ حكيمڭ حقيقى بر تفسيرى اولان رسالۀِ نورڭ دگل بتون كلّياتنى بلكه بر جزئنى بيله ثنا ايتمگه مقتدر دگلم. يوقاريده عرض ايتديگم گبى، قيمتنى بليرتمگه چاليشديغم أثرلرده گيزلى جمعيته دائر موضوعلر تثبيت ايديلمش ايسه، ضررلى أثرلرى طانيتمغه چاليشمش صوچيله جزالانديريڭز. فقط خارق العاده و فوق العاده بر شكلده تأليف ايديلمش اولديغى علمى شخصيتلر طرفندن تصديق ايديلن و بوزولان بر جمعيتى إصلاح ايتمك قدرتنى حائز اولان و يگرمنجى عصرده‌كى إنسانلره رهبر اولوب ضلالتدن و ماترياليزمڭ، مادّيونلغڭ و طبيعت‌پرستلگڭ سوروكله‌ديگى سفاهت و قويو فكر قراڭلغندن قورتاران و بشريته أبدى سعادت و سلامت چغيرلرينى قرآنِ حكيمڭ فيضيله آچان و نوريله آشكار بر شكلده گوسترن رسالۀِ نور كلّياتنده إسناد ايديلن صوچه دائر بحثلر موجود دگل ايسه، جزالانديريلمقلغمڭ عدالت أساسلرينه ضد اولاجغنى، محكمه‌ڭزڭ ده قبول ايده‌جگى قناعتنده‌يم