اوتوز اوچ آياتِ كريمه‌نڭ إشاراتى و إمامِ على (رض) و غوثِ أعظمڭ (رض) و يوزلرله أهلِ تحقيقڭ تقديركارانه بياناتيله بر نورِ قرآن اولديغى و اوڭا ياپيشانلرڭ إن شاء اﷲ ايمانلرينى قورتاره‌جقلرى قطعى تحقّق ايدن رسالۀِ نور، قطعيًا سوندوريله‌مز، غيب ايديله‌مز. بوڭا مثال: يگرمى بش سنه‌دن بَرى اونى إمحا ايتمك غايه‌سيله ياپيلان هجوملر بِالعكس اونڭ فوق العاده ياييلماسنه و پارلاماسنه وسيله اولدى. چونكه اونڭ صاحبى، أزلدن أبده قدر هر شى قدرتِ أزليسنده و أمرنده اولان بر سلطانِ ذو الجلالدر. چونكه اونڭ حقائقلرى قرآنڭ حقيقتلريدر و جنابِ حقّڭ حفظ و عنايتيله دائما پارلايه‌جقدر إن شاء اﷲ...

ايمان و إسلاميتى أڭ يوكسك بر سَوْگى و إشتياقله اوگرتن و رضاءِ إلٰهيدن باشقه بر هدف و مقصد طانيميان و بو عصرده قرآنڭ بر معجزۀِ كبراسى و تفسيرِ نورانيسى اولديغى قطعى تحقّق ايدن رسالۀِ نورى اوقومق و يازمق و اونڭ حقائقِ ايمانيه‌يى درس ويرن رساله‌لرينى مؤمن قارداشلرينه ويرمك بر صوچ ايسه؛ و دينڭ أوامرِ قدسيه‌سندن اولان رابطۀِ دينيه و اخوّتِ إسلاميه و اﷲ سَوْگيسى اوغرنده ايمان و قرآن يولنده برلشمك گبى مقدّس و إلٰهى و اُخروى قارداشلق بر جمعيت ايسه؛ بويله مبارك بر جمعيته منسوب اولمق بنم ايچون بيوك بر سعادتدر. و هر درلو تلطيف و نشانلرڭ اوستنده بر بختيارلقدر. بويله بر سعادت و بختيارلغى قزانديران رسالۀِ نورڭ طلبه‌سى اولمق گبى بيوك بر لطفى، بنم گبى بر بيچاره‌يه نصيب ايدن اللّٰهه حدسز شكرلر اولسون. صوڭ سوزم: {حَسْبُنَا اﷲُ وَنِعْمَ الْوَكِيلُ ❊ حَسْبِىَ اﷲُ لاَ اِلٰهَ اِلاَّ هُوَ عَلَيْهِ تَوَكَّلْتُ وَهُوَ رَبُّ الْعَرْشِ الْعَظِيمِ} در.