رسالۀِ نور ايسه، كلمه و جمله‌لريله نورِ قرآندن و نورِ محمّديدن (ع‌ص‌م) گلن أزلى و أبدى بر نور اولديغنه شهادت ايدييور.

او ده قرآنه منسوبيتى و خاص بر تفسيرى جهتيله و بو إعتبارله سماويدر، عرشيدر. ايشته خلقى حكومت عليهنه تشويق ايديجى ظن ايديلن رسالۀِ نور، بتون سوزلرى بتون لمعه و شعاعلرى و بتون مكتوباتيله حقائقِ إلٰهيه و دساتيرِ إسلاميه‌يى و أسرارِ قرآنيه‌يى درس ويرييور. عجبا بويله محترم و چوق يوكسك و أخلاق و فضيلتى و حقائقِ ايمانيه‌يى قطعى درس ويرن رسالۀِ نورى اوقومق و اونڭ أبدى سعادتلر بخش ايدن يازيلرينى إستنساخ ايتمك ويا بر مؤمنڭ إستفاده‌سى ايچون ايمان جهتنده اوڭا خدمت ايتمك بر صوچ ميدر؟ خلقى حكومت عليهنه تشويق ميدر؟ و بويله مبارك و معظّم بر أثرڭ مؤلّفى و كمالاتِ إنسانيه‌نڭ ذروۀِ بالاسنده، أڭ يوكسك بر مرتبۀِ ايمان و أخلاق و فضيلتله مجهّز بر نور آبده‌سنى زيارت و بو عصرده اييلك و طوغريلقله و صارصيلماز ايمان و إعتقادلريله إسلاميت شرفنى و قرآنڭ حقائقنى قورويان و يوكسلتن و اللّٰهڭ رضاسنى قزانمقدن باشقه غايه‌لرى اولميان رسالۀِ نور طلبه‌لريله ايمان و قرآن يولنده قارداشلق پيدا ايتمك بر جمعيت قورمق ميدر؟ عجبا هانگى تميز و عادل وجدانلر بوڭا جزا ويره‌بيلير؟

صايين حاكملر!

حقّانيتى، أڭ يوكسك عالملر طرفندن تصديق ايديلن و أڭ يوكسك بر مرتبۀِ ايمانى و عشقِ إسلامى قزانديران رسالۀِ نور، هيچ شبهه يوقدر كه اونڭ بتون سوزلرى و لمعه و شعاعلرى قرآنِ معجز البيانڭ برر نورانى تفسيريدرلر. معنوى خسته‌لقلرى و معنوى قراڭلقلرى إزاله ايدن غايت پارلاق برر گونشدرلر. رسالۀِ نورڭ مؤلّفلگيله توظيف ايديلن استاديمزڭ ايمان و قرآن يولنده گچن و هر درلو زورلق و صيقنتيلره گوگس گره‌رك قرآن حقيقتلرينى نشر ايله بو عصرده‌كى، خصوصًا بو مبارك ملّتڭ أولادلرينى قومونيستلك و هر درلو دينسزلگڭ دهشتلى هجومندن قورتارمغه چاليشان، تميز و پُرُزْسز حياتنڭ شهادتيله، او بو زمانده بو قدسى وظيفه ايله توظيف ايديلمش. او بزه (حاشا!) بوزغونجيلق و أخلاقسزلق درسنى ويرمييور. بلكه او بزه، نوعِ بشر دنياسنڭ أڭ بيوك دعواسى و أڭ مهمّ مسئله‌سى اولان ايمانى قورتارمق درسنى ويرييور. يگرمى‌بش اوتوز سنه‌دن بَرى يوز بيڭلرله أهلِ ايمانڭ رسالۀِ نورله ايمانلرينڭ قورتولمسنه چاليشماسى؛ بِالخاصّه بنم گبى إسلاميتدن خبرى اولميان بيچاره‌لره أڭ بيوك سعادت و حياتڭ غايه‌سى اولان ايمانى درس ويرمسيله ألبته و ألبته او بزه بر لطفِ إلٰهيدر. اونڭ قدسى خدمتِ ايمانيه و وظيفۀِ دينيه‌سنى إنكارله، بتون حق و حقيقتڭ عكسنه اونى حياتِ إجتماعيه‌يه ضررلى گورنلره ديرز