فقط نه حزين و آجيقلى و بيڭلر تأسّفلره شايسته بر وضعيتدر كه؛ بو إسلاميت قهرمانى و خارق العاده بيوك ذات، يگرمى بش سنه‌در حپسلرده، زندانلرده، تجريدِ مطلقلرده إمحا ايديلمگه چاليشيلمقده‌در.

قومونيستلرڭ إهانتيله ميدانه گلن أوهامڭ ايجاب و نتيجه‌سى اولان غرضكارلقلرله رسالۀِ نور مؤلّفى جزالانديريلسه دخى، رسالۀِ نور أثرلرى ينه بيوك بر إشتياق و گيتدكجه آرتان بر علاقه ايله اوقونمقده دوام ايده‌جكدر.

برنجى و أڭ قوّتلى دليلى شودر كه: يڭى حرف ايله تكثير ايديله‌بيلن عصاىِ موسى أثرينى اوقويان گنجلر، قرآن حرفلرى ايله يازيلمش متباقى أثرلرى ده اوقويه‌بيلمك ايچون قيصه بر زمانده او يازى‌يى ده اوگرنييورلر. بو شكلده بر چوق علملرڭ اوگرنيلمه‌سنه أنگل اولان و ديندن ايماندن چيقارمق ايچون تأليف ايديلن أثرلرى اوقومغه مجبور ايدن قرآن خطّنى بيلمه‌مك گبى بيوك بر سدّى ده ييقمش اولويورلر. بر ملّتڭ گنجلگى نه زمان قرآن و اوندن لمعان ايدن علملرله تجهيز و تحكيم ايديلمش ايسه، او وقت او ملّت ترقّى و تعالى ايتمگه باشلامشدر. گنجلك، ايمان و إسلاميت إحتياجيله يانان روحلرينى قرآن تفسيرى رسالۀِ نورڭ فيوضات و أنواريله طولديرمغه باشلامشدر. بويله‌لكله تحقيقى بر ايمانه صاحب اولاجق گنجلگمز؛ دينسزلگه، قومونيستلگه قارشى مجادله ايدوب وطنلرينى إسلام دشمنلرينه أصلا صاتديرميه‌جقلردر. بونڭ ايچون؛ أگر قومونيستلر مركّب و كاغدى يوق ايتمك إمكاننى ده بولسه‌لر، بنم گبى بر چوق گنجلر و بيوكلر فدائى اولوب حقيقت خزينه‌سى اولان رسالۀِ نورڭ نشرى ايچون، ممكن اولسه دريمزى كاغد، قانمزى مركّب ياپديره‌جغز.

أوت، أوت، أوت، بيڭلر دفعه أوت