صايين صاوجى، بزه كتبخانه‌لرى طولديران بيڭلرجه عربجه و بوگونڭ روحنه ترجمان اولاميان كتابلرى توصيه ايدييور. صايين صاوجى و اونڭ گبى دوشوننلر، رسالۀِ نور نامى آلتنده‌كى كلّياتِ علميه‌يى و خزينۀِ حرّيتى و حقيقتِ عاليه‌يى بگنميه‌بيليرلر، تنقيد ده ايده‌بيليرلر. بو كنديلرينڭ بيله‌جگى بر ايشدر. بزم شو ويا بو أثره رغبت ايتمه‌مزه و اوڭا قيمت ويرمه‌مزه قاريشه‌مازلر. بز رسالۀِ نورى سَوييورز. و اونى حقيقى و رياسز بر دين كتابى و قرآن تفسيرى بيلييورز. قيمت ئولچولرى و حكملرى وجدانى بر تقدير مسئله‌سيدر. بوڭا كيمسه مداخله ايده‌مز. أوت بز رسالۀِ نور مؤلّفنڭ ولايتنه و دائما عينِ حقيقت درسى ويرديگنه قائلز. كنديسنڭ قبول ايتمه‌مسى، بزم بو قناعتمزى صارصمييور. آنجق بزم قبول ايتديگمز، كرامتِ كونيه‌سندن طولايى دگل، نورلرڭ درسنده خارق العاده و أكمل تظاهرلرينه شاهد اولديغمز و بتون جهانِ عرفانه ميدان اوقويان كرامتِ علميه‌سندن طولاييدر