محترم هيئتِ حاكمه!

مادام كه بويله دهشتلى بر إسناد ايله بوراده طوپلانمش بولونويورز. اويله ايسه شو أهمّيتلى حقيقتى بيان ايتمك، بنم ايچون مملكت و وجدان بورجى اولمشدر: يالڭز كندى محيطمده رسالۀِ نورڭ گوسترديگى فوق العاده إصلاحات ايله بتون خلقڭ گوزى اوڭنده شو اون سنه‌يى متجاوز بر زمانده باشده كندم اولمق اوزره بر چوق كيمسه‌لر وار كه، أولرينڭ يوللرينى اوگرنمشلر. سفلى گيديشاتلرى عائله سعادتنه دونمش. شيمدى آنالرى بابالرى، سبب اولانلره دعا ايدييورلر. ولايتمز داخل و جوارلرنده بو قبيلدن داها بر چوقلرينڭ حاللرينى ديڭله‌يڭز. باخصوص دڭزلى حپسخانه‌سنده، رسالۀِ نور اورايه گيرمه‌سيله محبوسلر اوزرنده اويله بر حسنِ تأثير ياپمشدى كه؛ حالاً بو تأثير ديللرده گزمكده‌در. كذا بو آفيون حپسخانه‌سنه داخل اولديغم زمان كيمڭ ايله قونوشسه‌م، أسكى حاللريله شيمديكى حاللرينى ذكر ايدوب منّت و شكرانله نور طلبه‌لرينه دعا ايدييورلر. بو حقيقتلر ميدانده‌در... بن إنسان اولايم ده، بڭا و همجنسمه بو درجه أخلاقى و إجتماعى و اُخروى إصلاح ايديجى و باخصوص كتابمز قرآنڭ مهمّ بر تفسيرى اولان رسالۀِ نوره و اونڭ محترم مؤلّفنه و وطنداشلرينه مسلمانجه محبّت و تسلّى مكتوبى يازمق، بر سياست موضوعى اولاجغنه حيرت ايدييورم. ايشته بو حيرتله دييورم كه؛ بويله صوچ اولماز. اولسه اولسه قرآن و طولاييسيله رسالۀِ نورڭ گيزلى دشمنلرى عدليه و ضابطه‌يه أوهام ويروب بزلرى بويله حپسلره طولديرمغه سبب اولويورلر. ألبته يوكسك حاكملر بو حقيقتلرى گوره‌جكلر و أللرينى وجدانلرينه قويوب أبدى و إلٰهى چوق مژده‌لرى بولونان عدالتلى قرارلرينى ويره‌جكلر و وطنڭ درت كوشه‌سنده علاقه ايله بكله‌ين مسلمان تورك ملّتنى كنديلرينه منّتدار بيراقه‌جقلردر.