درياىِ معارفدن سماىِ عرفانه إلٰهى بر هوا ايله جوشوب فيشقيران و سماىِ عرفاندن زمينِ معارفه إلٰهى بر هوا ايله اينن بارانِ معرفتى و فيضانِ حكمتى زمين ايله آسمان آراسنده سيره طالمشدم. بو صيره‌ده جوشان دريانڭ قعرندن، ساحلِ بيانه بها تقدير ايديله‌مه‌ين جواهر گلييوردى. بونلردن بر مقدار اولسون آلمغه إقتدارم گلمييور و گله‌مييوردى. يالڭز گوروب آلابيلديگم بر شى وارسه، بديعڭ جلوه‌سيله بديعياتڭ نشئه‌سيله حيرتدر.

اون دردنجى عصرڭ أللى ايكنجى سالنه يتيشوب، أحكامِ قطعيه‌سيله مؤمنه برائت و مجرمه إعدامِ أبدى قرارينڭ إنفاذ و إجراسى گوننه قدر باقى قالا‌جق اولان قوانينِ أزليۀِ سبحانيه‌يى، بِالكلّيه هدم و إمحا ايتمك آمالِ باطله و أفكارِ منافقانه‌سنه قاپيلان أهلِ ضلالت، ايلك خطوه‌لرينى آتمق ايستدكلرى صيره‌ده، كشفِ قبل الوقوع اولارق، إشبو چليك قلعه تعبير ايتديگمز، قرآنِ معجز البيانڭ مفسّر و ممثّلى اولان نور درياسى ظاهرًا اوتوز اوچ عدد، معنًا اوتوز اوچ ميليون ألماس، اينجى و مجوهراتِ متنوّعه و متعدّده‌يى وجوده گتيردكدن صوڭره، أصل قلعه‌نڭ بو تشكيلاتِ نورانيه و مهمّه دائره‌سنده تنظيم و ترصينى إقتضا ايتديگى هنگامده، أدنا بر عمله اولارق، يوز بيڭ دفعه حدّمڭ فوقنده اولان شو قدسى وظيفه‌يه، بو عبدِ عاجز ده، تعيين و قبول ايديلمكده‌كى توفيقاتِ سبحانيه‌يه قارشى، سجده‌گاهِ ربّانيه‌ده مطالعه و ريا اولماسين شو فانى وجوديمى آرامسز إفنا ايتسه‌م، او مقدّس وظيفه دائره‌سنده، بر دقيقه مشرّفيتمه مقابل عبوديت ايتمش اولاميه‌جغمدن، {اِلٰهِى اَنْتَ ذُو فَضْلٍ وَ مَنٍّ وَ اِنِّى ذُو خَطَايَا فَاعْفُ عَنِّى} قصيدۀِ شريفه‌سيله عرضِ عبوديت ايتمكله إكتفا ايتدم.