سَوْگيلى و قيمتدار استادم، أفنديم!

حافظ على أفندى قارداشمله إرسال بويوريلان يگرمى طوقوزنجى مكتوبڭ طوقوزنجى قسمنى پك بيوك بر سَوينجله آلدم و اوقودم. قسمًا قارداشلرمله، قسمًا ده يالڭز باشمه، بش آلتى دفعه اوقوديغم حالده، بو رساله‌نڭ روحمه إلقا أيلديگى نورانى فيضلرى قارشيسنده، اوقودقجه اوقومق إحتياجم آرتييوردى. و سنه‌لردن بَرى مشتاقى بولونديغم طريقتڭ بويله علوى، نزيه، عالى حقيقتلرينى اوگرتن بو قيمتدار رساله‌يى أليمدن بيراقه‌مييورم. هر اوقودقجه باشقه بر ذوقى ويرن و كندى آرقداشلرى اولان ديگر رساله‌لر گبى، هر باقيشده باشقه بر گوزللك و لطافت گوسترن بو رساله‌يى و ايچنده‌كى علوى و عالى حقيقتلرى بزه اوقويان لوحه‌لرڭ مندرجاتنى بلكه درت بش سنه‌دن بَرى آرايور، بولامييوردم.

سَوْگيلى استادم، اﷲ سزدن أبديًا راضى اولسون. ناصلكه بحرِ محيط ايچريسنده ياشادقلرى حالده، صوسز قالمالرندن طولايى دگل، بلكه كنديلرنده ذى‌قيمت شيلرڭ حصولى ايچون، نيسان ياغمورينه شدّتلى بر علاقه ايله إحتياج گوسترن باليقلر گبى، بنم ده بو رساله‌يه إحتياجم شدّتلى ايدى. جنابِ حق و فيّاضِ مطلق حضرتلرينه بى‌نهايه شكر اولسون كه، حياتمڭ بو قراڭلق صحيفه‌سنى ده آرزولريمڭ پك فوقنده اولارق نورلانديردى.

أوت بو رساله‌نڭ فقير طلبه‌ڭزده حاصل ايتديگى تأثير و إنطباعلرينى، قلمله إفاده‌دن هر وقت ايچون عاجزم. كوچك كوچك جمله‌لرى و آناختارلريله پك بيوك دفينه و خزينه‌لرى آچان و عظيم گردابلرى قپاتان و طريقتڭ نزيه، عالى و چوق يوكسك فيضلى، سرورلى، ذوقلى، طويولماز و بيراقيلماز بر يول اولديغنى درس ويرن بو قيمتدار رساله‌يى چوق أهمّيتلى بولويورم. و بِالخاصّه طريقته منسوب اولوب ده، خارجڭ إتهامندن قاچينان وياخود اوگرنمك و آڭلامق ايستدكلرى حالده موفّق اولاميان و علاقه‌دار اولمق ايسته‌ين قارداشلريمى، بو رساله‌يه مالكيتلرندن طولايى تبريك ايتمكده، كنديمى چوق حقلى گورويورم