فقط مناسباتِ توافقيه‌يه دائر إشارتلر، مطلق و مجمل و كلّى صورتده سنوحاتِ إلهاميه‌در. تفصيلات و تفرّعاتده بعضًا پريشان ذهنم قاريشير، نقصان قالير، خطا ايدر. بو تفرّعاتده خطام، أصله و مطلقه ضرر ايراث ايتمز. ذاتًا قلمم اولماديغندن و كاتب هر وقت بولونماديغندن تعبيراتم پك مجمل و نوطه حكمنده قالير، فهمى إشكال ايدر

بيليڭز، قارداشلرم و درس آرقداشلرم! بنم خطامى گورديگڭز وقت سربستجه بڭا سويله‌سه‌ڭز مسرور اولاجغم. حتّى باشمه وورسه‌ڭز، اﷲ راضى اولسون دييه‌جگم. حقّڭ خاطرينى محافظه ايچون، باشقه خاطرلره باقيلماز. نفسِ أمّاره‌نڭ أنانيتى حسابنه، حقّڭ خاطرى اولان بيلمديگم بر حقيقتى مدافعه دگل، على الرأس والعين قبول ايدرم

بيليڭز كه؛ شو زمانده شو وظيفۀِ ايمانيه چوق مهمدر. بنم گبى، ضعيف، فكرى چوق جهتلرله إنقسام ايتمش بر بيچاره‌يه يوكلتمه‌ملى، ألدن گلديگى قدر يارديم ايتملى. أوت، مجمل و مطلق حقائق؛ بز، ظاهرى وسيله اولوب چيقييور. تنظيم و تصفيه، تصوير ايسه؛ قيمتدار، مقتدر درس آرقداشلريمه عائددر. بعضًا اونلره وكالةً تفصيلاته، تنظيماته گيريشييورم، نقصان قالييور

بيليرسڭز كه؛ ياز موسمنده دنيا غفلتى زياده حكم ايدر. درس آرقداشلريمزڭ چوغى فتوره دوشوب، تعطيلِ أشغاله مجبور اولويور. جدّى حقائق ايله تام مشغول اولامييور. جنابِ حق كمالِ رحمتندن ايكى سنه‌در جدّى حقائقه نسبةً يميشلر، فاكهه‌لر نوعندن توافقاتِ لطيفه ايله أذهانمزى تلطيف ايتدى، ذهنمزى نشئه‌لنديردى. كمالِ مرحمتندن او توافقاتِ لطيفه ميوه‌لريله، جدّى بر حقيقتِ قرآنيه‌يه ذهنمزى سَوق ايتدى و روحمزه او ميوه‌لرى غدا و قوت ياپدى. خرما گبى، هم فاكهه، هم قوت اولدى. هم حقيقت، هم زينت و مزيت برلشدى