أى خواجه‌لر و أهلِ قلب! صوره‌جغڭز سؤاللرڭ جوابلرينى رسالۀِ نورده بولابيليرسڭز. أهلِ كشف و قلبدن بريسى، بنم گبى عاجز بر إنساندن مهدى‌يى صورويور، ”نه وقت گله‌جك؟“ داها مهدى‌يى آڭلايه‌مامش. دابّة الأرض كيملر اولديغنى بيلمييور. بونلره دائر، رساله‌لرده برر بحث واردر. هر مشكل سؤالڭ جوابنى او رساله‌لردن آرايڭز، بولورسڭز.

أى خواجه‌لر و خليفه‌لر! بزم علممز بزه يتر دييوب، ييلديز بوجگى گبى شوقڭزه، علمڭزه آلدانمه‌يڭ. إنسانڭ كندى بيلديگى كندينه كافى گلمز. هر إنسان، هر مسئله‌يى يالڭز آڭلايه‌ماز. اويويورسڭز! اويوديغڭز مقدار آرتيق يتر! اويانمالى...

پدر و والده‌م و جمله آرقداشلرم و برادرم على چوق سلام ايدوب، ايكى أللرڭدن اوپر و دعا ايتمكده‌درلر.

(رسالۀِ نورڭ تسويدنده چوق خدمتى سبقت ايدن تميز قلبلى، إخلاصلى، گوزل بر حافظ، مدقّق بر خواجه اولان حافظ خالدڭ بر فقره‌سيدر.)

رسالۀِ نورڭ مؤلّفى بديع الزمان، نادرۀِ جهان، خادمِ قرآن سعيد نورسى حقّنده حسّياتمدن بيڭدن برينى بيان ايدييورم:

استادم (كنديسى) نور إسمِ جليلنه مظهردر. بو إسمِ شريف، كنديلرى حقّنده بر إسمِ أعظمدر. كندى قريه‌سنڭ إسمى نورس، والده‌سنڭ إسمى نوريه، قادرى استادينڭ إسمى نور الدين، نقشى استادينڭ إسمى سيّد نور محمّد، قرآن استادلرندن حافظ نورى، خدمتِ قرآنيه‌ده خصوصى إمامى ذى النّوريْن؛ فكرينى، قلبنى تنوير ايدن آيتِ نور اولماسى و مشكل مسائلنى ايضاحه واسطه اولان نور تمثيلاتى غايت قيمتداردر. رسائلڭ مجموعنه رسالۀِ نور تسميه‌سى، نور إسمى اونڭ حقّنده إسمِ أعظم اولديغنى تأييد ايتمكده‌در