عزيز استاد! عالمِ إسلامه اينديريلن او عظيم ضربه‌لر، عالمِ إسلام حسابنه سزڭ اوموزلريڭزه إصابت ايتديگنى بيلييورم. بويله اولمقله برابر، علوى روحڭز، عالى حميتڭز، حددن أفزون صبريڭز، داها پك چوق و پك گوزل خصلتلريڭز اوزرنده أڭ بارز ايزلرى گوزوكن شفقتڭز، ظالملر حقّنده ده خير دعا ايتمك اولويور

جنابِ واجب الوجود و تقدّس حضرتلرينڭ، جبريلِ أمين واسطه‌سيله، آخر زمان نبيسى پيغمبريمز عليه الصلاة والسلام أفنديمزه گوندريلن و بوگونه قدر محافظه ايديلن قرآنِ حكيمى حقيقتيله و حق سوزلر ايله، حقّڭ ياراتمش اولديغى قوللرينه ترجمانلق ايدن و حقّڭ رضاسى ايچون گيجه و گوندوز دعا ايدن، حقيقى سعيددن بر محبّتنامه آلدم كه، او ده استادم أفنديمڭ مكتوبيدر.

جدّى و صميمى دوستمز و قارداشمز بولونان عاصم بگه وارديغمده مژده‌له‌دى. بش دقيقه قدر گوروشدم. و گوندرمش اولديغڭز أمانتلرى آليركن اويله سَويندك كه، بلبلڭ گُل دالنده سَحَر وقتنده عشقندن آغزندن چيقارمش اولديغى نغمه‌لر گبى ايشيتدك. اونڭ ايچون بربريمزله نه قونوشديغمزى بيله‌مدك. بيلديگم شو قدر كه: يالڭز آيريليركن چوق شكر جنابِ اللّٰهه، بويله أنوارِ قرآنيه‌يى نشر ايدن بر استاديمز واركن، هيچ بر وقت سعادتمزدن محروم قالمايز دييه بيلدك