عزيز، صدّيق، فداكار و وفادار قارداشم كرد بكر بك!

مع التأسّف بِالمجبوريه ناخوش و مالايعنى صاييله‌جق بر بحث سويله‌يه‌جگم. فقط بو بحثم، حقيقى حميت‌پرور توركجيلره قارشى دگل، بلكه فرنگيلك حسابنه ساخته‌كار بر صورتده توركجيلگى كندينه پرده ايدن متجاوزلره قارشى سويله‌يورم. شويله كه:

ملحد منافقلرڭ أڭ صوڭ و آلچاقجه و وجدانسزجه عليهمزده إستعمال ايتدكلرى بر سلاحى شودر كه، دييورلر: ”سعيد كرددر، بر كردڭ آرقه‌سنده بو قدر قوشمق حميتِ ملّيه‌يه ياقيشماز.“ بن بو منافقلرڭ وجدانسزجه دسيسه‌لرينه قارشى دگل، بلكه صافدللرڭ تميز قلبلرى بونلرڭ سوزلريله بولانمامق ايچون دييورم كه:

أوت بن باشقه مملكتده دنيايه گلمشم. فقط جنابِ حق بنى بو مملكتڭ أولادينه خدمتكار ايتمش كه؛ طوقوز سنه متماديًا بو مملكتده‌كى ملّتڭ اوندن طوقوز قسمنڭ سعادتنه كندى ديللريله خدمت ايتديگم، بو حواليده‌كى إنسانلره معلومدر.

هم بن بو مملكتده خلوصى، صبرى، حافظ على، خسرو، رأفت، عاصم، مصطفى چاوش، سليمان، لطفى، رشدى، مصطفى، ذكائى، عبد اﷲ گبى يگرمى اوتوز مسلمان تورك گنجلرينى عادتا يگرمى اوتوز بيڭ ملّتداشلريمه ترجيح ايتديگمى و اونلرى او اوتوز بيڭ آدم يرينه قبول ايتديگمى، بو طوقوز سنه‌ده‌كى توركجه آثار ايله و خدمت ايله گوسترمشم. أوت بن بيڭ غافل و عامى كردى بر تورك اولان خلوصى‌يه قارشى طوتماديغمى و بيڭ جاهل كردى برر تورك اولان عاصم و رأفته مقابل گوره‌مديگمى و بر گنج اولان خسروى بيڭ عامى كردله دگيشمه‌ديگمى أهلِ دقّت و بنم أحوالمه مطّلع اولانلر تصديق ايتدكلرى حالده؛ فرنگيلك نامنه و إلحاد حسابنه، توركجيلك پرده‌سى آلتنده، ساخته‌كار بر ملّيت‌پرورلك صورتنده و خودفروشلق جهتنده بڭا تجاوز ايدنلر و تورك ملّتنى و ملّيتنى زهرله‌ين ملحدلر بيلسينلر كه: بن ملّتِ إسلاميه‌نڭ أڭ مهمّ و مجاهد و معظّم بر اوردوسى اولان تورك ملّتنه بيڭلر تورك قدر خدمت ايتديگمى، بيڭلر تورك شاهددرلر. ايشته بڭا كرد ديين و إتهام ايدن، ظاهر حميت‌پرورلك گوسترن ساخته‌كارلر، بو ملّته نه گبى خدمت ايتدكلرينى گوسترسينلر.