بو فرعونجقلرڭ أنانيتنى قبارتان محويتكارانه سوز سويله‌مك جائز اولماديغندن، بِالمجبوريه او متكبّرلره قارشى عزّتِ علميه‌يى محافظه ايتمك ايچون، سويلنميه‌جك و إظهارى مناسب اولميان اُخروى خدمتلريمى جنابِ حقّڭ عفوينه گووه‌نه‌رك إظهار ايتدم

عزيز استادم

بو أليم حادثات خصوصنده صبر و توكّلدن بحث ايتمك بيليرم كه، زائددر. أساسًا بزم گبى حياتڭ جزئى إضطرابندن آه و أنين ايدن كمترلره، صبر و توكّل گبى دفينۀِ سعادت و نجاتڭ قيمتنى سز اوگرتديڭز. حمد اولسون، گوندن گونه بو كلمه‌لرڭ مفهومنى داها ايى قاورايورز و تقدير ايده‌بيلييورز. ايلك زمانلرده يعنى نورلره چوق اوزاق اولديغمز غفلت زمانلره، حياتده، حادثاتده، هر شيده (صبر و توكّل) بزلره ظاهرًا آجى و قابلِ هضم دگل گبى گلييوردى، اويله گورييوردق. فقط بو خصوصاتى بِحقٍّ تلقين و تنوير بيوران استاديمزڭ إرشادى، بزم نظريمزده سطحى و ظاهرى شيلرى سيلمكده‌در. بو فقيرڭ و گناهكارڭ أڭ زياده مدارِ سرورى اولان بر شى وارسه، او ده آنجق عقل و فكر و بحرِ محيطِ كبيردن بر قطره نسبتنده قلب گوزيله حقيقى نورلرى گوروب موقّت بر آن و زمان ايچون متلذّذ اولماسيدر

سَوْگيلى استادم، حمد اولسون قارداشلريمز فكرًا و روحًا حالِ ترقّيده‌درلر. إن شاء اﷲ، معنًا و نظرِ إلٰهيده ده ترقّى ايدييورلر. يگرمى يدنجى مكتوب گيتدكجه جوشان برّاق بر شلاله گبى چاغلامقده‌در. يگانه آرزوم و أملم طريقِ سلامت سالكلرينڭ كثرتنى و ألمزده‌كى مجموعۀِ حقائقڭ داها چوق قيمتلى و تميز أللرده طولاشديغنى گورمكدر. إن شاء اﷲ زمان بو مقتضاىِ حق و حقيقتى إجرا ايده‌جكدر. عاجزلرى بو اُميد و إنتظار ايله خيرلى عاقبتى جنابِ حقدن تمنّى ايدييور و شيمديلك غيّور، صادق، متّقى آغابگلرم و قارداشلريمڭ مزيتلريله و تميز قلبلريله و حسنِ نيّتلريله إفتخار ايدييورم. نورلرله، پروژكتورلرله، سماوى ييلديزلرله أزلى بر ايمان گبى معنوى طوپلرله مجهّز اولان سفينۀِ معنويه‌مزڭ شو زمانڭ طالغه‌لرندن، قاصيرغه‌لرندن آزاده قالماسنى جنابِ خلاّقِ عالمدن يالواريركن متوجّه اولديغمز، خلقتِ عالملره باعث و بادى اولان ايكى جهان سَرْورى، عاجزلرڭ سندى جنابِ پيغمبر عليه الصلاة والسلام أفنديمزڭ و أتباعى أرواحنڭ سفينه‌مزڭ أركان و أتباعيله متّفق اولديغى اُميد و ايماننى بسله‌يورم. عاجزلرى ايسه، معنًا هر آن ضرر و زيان ايچنده بر طرفدن إصلاحِ حال ايده‌مه‌مش، خساره اوغرايان مقدّس بيلگيلرڭ تصحيح و تقويه‌سنه محتاج، ديگر طرفدن نفسڭ هجومنه معروض و حظوظاتنه مبتلا، اوبر طرفدن گناهلرينه مقابل اولميان جزئى بر عبوديتڭ سعادتِ أبديه‌يى بِحقٍّ تأمينه كافى گله‌ميه‌جگندن قورقوب قصورلريمڭ جزاسنڭ تخيّلندن آن بَاٰنْ مضمحلم. بزلر كندى عبوديتمز و بو ناقص خدمتمزله بزه دليل بر مرشد و بر شفيع اولمادقجه سعادتِ أبديه‌يه واصل اولمق نه قدر اوزاق. هيهات! حياتِ دنيويه دوم‌دوز دگل. حسّياتِ بشريه تبدّله پك مستعد