برنجى، ايكنجى سوزلر چوق أللرده طولاشدقلرى ايچون، اوقونماز بر حالده ايديلر. كذا إستنساخ ايتدم. قلبمه گلدى كه: ”عجبا شو إسلام و ايمان حجّتى اولان سوزلرده بر سرِّ توافق وار مى؟“ دييه باقدم، گوردم، {اَلْحَمْدُ ِﷲِ هٰذَا مِنْ فَضْلِ رَبِّى} ديدم. آڭلادم كه، رساله‌لرده عموميتله بر كتلۀِ إعجاز و شمسِ سرمدينڭ سونمز بر ضياءِ حقيقتى گورونويور. ناصلكه قرآنِ حكيم بتون دنيايه، إنس و جنّه بيڭ كسور سنه‌دن بَرى ندا ايدوب، دشمنلرينى إسكات و دوستلرينى مفرّح ايدوب، حكمى قيامته قدر باقيدر. اويله ده، قرآنِ حكيمڭ حقيقى مفسّرى اولان رسالۀِ نور و أجزالرى، بو ظلماتلى پرده‌لرڭ آلتندن كنديلرينى گوستروب نشرِ أنوار ايتدكلرى گبى، إن شاء اﷲ بر زمان اولاجق ظلمات پرده‌لرينى ييرته‌رق، بتون دنيايه خطاب ايدوب، قرآنِ معجز البيانڭ معجزۀِ باهره‌سنى إثبات ايده‌جكدر. جنابِ حق إلى يوم القيام نشرِ أنواره خدمت ايدن خادملرينڭ تكثيرينى إحسان بيورسون.