نورلرڭ إنتشارنده برق گبى بر سرعت لازم گليركن، جزئى بر بطائتدن هر زمان أسفله بحث ايتديگم، معلومِ عاليلريدر. ياقين وقتده بعض مشتاقلر داها، سوز دائره‌سنه إلتحاق ايتديلر. قلبمه گلن بر إخطارله كيفيتِ إنتشارى دوشوندم و شو حقيقتلرى حسّ ايتدم. حتّى قانع اولدم:

مبارك سوزلر و مكتوبلر تمامًا اولماسه بيله بو محيطده ده هم ده يازيلمادن خيلى إنتشار ايتمشلر. جوار ديگر ولايت قضالرنده، بو آثارى گورمك و ايشيتمك ايسته‌ينلر چوق وارمش. فسبحان اﷲ، بو قدر جزئى و ناقص خدمتدن، بو درجه فائده ألده ايديلمسى ده گوسترييور كه؛ بو سوزلر و مكتوبلر حقيقةً نور إسمنڭ تجلّيلريدر كه، سهولتله إنتشار ايدييورلر. بو حال قارشيسنده حيرتله تفكّرده ايكن ”بسم اﷲ“ إسمنى آلان برنجى سوز خاطريمه گتيريلدى. و شويله دوشونمگه باشلادم. دنيايه آرقه‌سنى چويرن استاد، حضرتِ غوثڭ تشويقيله بلكه دلالتيله قرآنڭ غيرِ مكشوف بر خزينه‌سندن ”بسم اﷲ“ ايله گيرييور، قرآنى تارلايه ”بسم اﷲ“ دييه‌رك سوزلر تخمنى أكييور، فرقانى باغچه‌يه ”بسم اﷲ“ دييه‌رك، نورلى مكتوبلر چكردگنى ديكييور. أمرِ إلٰهى‌يه إمتثالاً أكيلن تخم و ديكيلن چكردكلرڭ إنكشاف و إنتشارلرى شبهه‌سز خارقه‌آسا اولور.

برنجى سوزده‌كى تمثيلده سياحت ايدن متواضع ذات، تمامًا استاديمزدر. نبات، آغاج و اوتلرڭ ايپك گبى يوموشاق كوك، طمارلرى ناصل ”بسم اﷲ“ تأثيريله، ير آلتنده سرت طاشى طوپراغى دلوب گچييورسه عينًا اونڭ گبى، ”بسم اﷲ“ ايله موقعِ إنتشاره وضع اولونان سوزلر ده، خارقه بر طرزده أرضه ياييليور. و أڭ منوّر و مكمّل ميوه اولان بشرڭ مؤمنلرينڭ قلبلرينه نفوذ ايدييورلر. بو بدعتلرڭ كثرتى و مخربلرڭ بوللغى دورنده ”بسم اﷲ“ ايله غرس اولونان نور فداننڭ ياپراقلرى اولان ديگر سوزلر و مكتوبلرله، بو قدسى فدانڭ دال و بوداقلرى اولان حزب القرآن و بو حزبڭ أساسى و سيّدى اولان محترم استاد ده بر حفظِ غيبى‌يه مظهر بولونويورلر.