شمسِ رسالتدن گلن قرآنى نورلرڭ أوّلاً استاده و بورادن ده بز بيچاره‌لره، بزلردن ده ديگر مشتاقلره إلخ.. إنتقال ايتمكده اولديغنى تصوّر ايتدم. الحمد ِﷲ ديدم. مهمّ بر رؤيامده عرض ايتديگم وجهله، سوزلريڭزڭ مؤمنلره إنتشارينه كوچك جماعتڭز عنايتِ إلٰهى ايله آخذه، واسطه اولمشلر. {كَمْ مِنْ فِئَةٍ قَلِيلَةٍ غَلَبَتْ فِئَةً كَثِيرَةً بِاِذْنِ اﷲِ} سرّينه مظهريتله معنوى غلبه‌يى تأمين، مركزده‌كى مرشدلرينه متوجّه و مراقب كوچك بر حلقۀِ توحيدى تشكيل ايدنلر گبى؛ بو كوچك جماعتڭزڭ هر برى آرقه‌سنده، بر نسبتِ متزايدۀِ منتظمه ايله آرتان، محروط شكلنده زمره‌’ِ موحّدينى گورور گبى اولدم. ”اﷲ أكبر“ ديدم. بو قدسى تصوّرى قارداشلريمزه آشاغيده‌كى لوحه ايله داها زياده ايضاحه چاليشه‌جغم. بو نورلى تفكّر، بڭا بيوك بر اُميد بخش ايتدى. معلّم جودى‌نڭ قصيده‌سنده‌كى شو مصراعى ده درخاطر ايتديردى:

جمع ايتدى قبائل و شعوبى

بر قبله‌يه باغلادى قلوبى

مولايه محبّتى مسلّم

صلّى اﷲ عليه و سلّم.

ايشته إتّباعِ سنّته (حاشيه) پك بيوك أهمّيت ويرن محترم استاديمز ده، بو عصرده {اَلْعُلَمَاءُ وَرَثَةُ اْلاَنْبِيَاءِ} سرّنجه، ايچلرينه صاچيلان نفاق تخمى يوزندن، هر گون برآز داها توحيدى بيراقانلرى بر قبله‌يه باغلامق ايچون، سوزلر و مكتوبات نامنده‌كى نورلى أثرلرله أهلِ ايمانى إرشاده چاليشييور. كفّاره، حتّى جنّ و شيطانلره دخى، مبدأِ نزولنده‌كى گبى، نصوصِ قرآنيه‌يى إعلان ايدييور. مخفى إعجازى إظهار ايدييور.