عزيز قارداشم مصطفى أفندى

بعض أماره‌لرله و بعض ذواتڭ حسنِ شهادتيله بڭا قناعت گلمشدر كه، ذاتڭز دخى مؤذّنزاده بكر أفندى گبى بڭا جدّى بر طلبه و صميمى بر آخرت قارداشى اولابيليرسڭز. هم سنڭ مرحوم پدرڭ حاجى سعيد أفندى، سلسلۀِ دعامده چوقدن بَرى داخلدر

بو دفعه‌كى غايت قيمتدار هديه‌ڭ اولان زمزم صويى و مدينۀِ منوّره خرماسنه مقابل، غايت قيمتدار و أهلِ ايمان مابيْننده نهايت درجه‌ده معتبر و أهلِ ضلالت باشنده صاعقه گبى تأثير گوسترن اوتوز برنجى سوز اولان معراج و شقِّ قمره دائر رساله‌يى و وحدانيت و معرفت اﷲ و محبّت اللّٰهه دائر و أهلِ تحقيق مياننده أمثالسز و پك مشهور و نورانى اوچ موقفلى اولان اوتوز ايكنجى سوزى تقديم ايدييورم. أگر ذاتڭز خطّى گوزل بر ذاتى بولوب سزه (كنديڭزه) إستنساخ ايتسه‌ڭ چوق ايى اولور. فقط تصحيحنه دقّت ايديلسين. بر ايكى دفعه، قارداشم سيّد شفيقڭ معاونتيله مقابله ايديلسين. صوڭره بكر أفندى آلسين. كندينه و قاين پدرينه يازديرسين. أگر ذاتڭز اويله ايى بر كاتب بولامادڭ، أصلى سڭا قالمق و بر قاچ دفعه بكر أفندى ايله برابر اوقومق شرطيله بكر أفندى‌يه ويا محمد أفندى ويا حافظ هدايت أفندى گبى قيمتنى تقدير ايدن و مناسب گورديگڭ ذاتلره وير، كنديلرينه يازديرسينلر

خبر آلمشم كه، عربى اولارق أسكى حروف ايله مطبعۀِ أوقافده طبع ايديلمك إذنى وارمش. أگر جنابِ حقّڭ رحمتيله، توركجه اولارق أسكى حروفه مساعدۀِ رسمى اولديغى دقيقه‌ده و بكر أفندى شو ايكى رساله‌يى سيّد شفيقڭ تحتِ نظارتنده تصحيحنه غايت دقّت ايتمك شرطيله چابوق طبع ايديڭز. طبع مصرفنى ده كيسه‌ڭزدن صرف ايتمگه مجبور دگلسڭز. چونكه حشر سوزينه سكسان بانقنوطى صرف ايتدك، اوچ يوز بانقنوطى قزاندق. ديمك بونلر صاتيلميه‌جق ماللر دگلدر. مسلمان روحلرى بونلره غدا گبى محتاجدرلر. يالڭز ايكى يوزه ياقين آبونه‌لر بولونسه، بريسى طبع ايديلسه هم فيآتنى چيقاره‌بيلير، هم باشقه رساله‌لرڭ ده طبعنه مدار اولابيلير. خلقلردن صدقه قبول ايتمديگم گبى، كتابلريمه ده صدقه‌لرله طبعنى قبول ايتمه‌م. يالڭز غيرتڭزى و همّتڭزى اوننجى سوز گبى، يالڭز ياڭليشسز و گوزلجه طبعنه و مطبعه‌ده‌كى تصحيحاتنه صرف ايديڭز. و برنجى اولارق طبع ايتديرديگڭز رساله‌نڭ مصارفِ طبعيه‌سى نه قدر ايسه بڭا بيلديريڭز. بن بورج ايدر، پاره گوندررم