بارلا لاحقه‌سى | يگرمى يدنجى مكتوب و ذيللرى | 284
(26-437)

أگر طبعنه موفّق اولديڭز، ذاتڭز پدريڭز گبى چوق سَوْديگڭز مدينۀِ منوّره و مكّۀِ مكرّمه أهاليسنه بر مقدار نسخه گوندرسه‌ڭز چوق ايى اولور. بلكه أسكى هديه‌لريڭزدن داها خيرلى هديه حكمنه گچه‌جكدر، إن شاء اﷲ.


اَلْبَاقِى هُوَ الْبَاقِى

سعيد النورسى

*******************************

(خلوصى بگه خطابدر)

بِاسْمِهِ سُبْحَانَهُ ❊ وَاِنْ مِنْ شَيْءٍ اِلاَّ يُسَبِّحُ بِحَمْدِهِ

اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ

عزيز قارداشم!


سزلر صباح و آقشام دعامده داخلسڭز. سز دخى بنى دعاڭزده داخل ايديڭز. شو عالمده مؤمنڭ مؤمنه قارشى أڭ بيوك يارديمى دعا ايله‌در. أگر بر آدم، دوستندن أمين ايسه كه غروره گيرمز، اونى شكره سَوق ايتمك ايچون تحديثِ نعمت نوعندن اوڭا عائد بر قسم إحساناتِ ربّانيه‌يى بحث ايتسه بأس يوقدر ظن ايدرم.


ايشته سنى غرورسز بيلديگم ايچون بو سرّى سڭا آچييورم. شويله كه: بن سوزلرى يازاركن إختيارسز اولارق أكثر تمثيلاتى، شئوناتِ عسكريه نوعنده ظهور ايدييوردى. بن حيرت ايدييوردم. نه‌دن بويله يازييورم، سببنى بولامييوردم. صوڭره خاطريمه گلدى كه، بلكه إستقبالده شو سوزلرى حقّيله آڭلايه‌جق، قبول ايدوب حرزِ جان ايده‌جك أڭ مهمّ طلبه‌لرى عسكريدن يتيشه‌جك. اونڭ ايچون بويله يازمغه مجبور اولويورم، دوشونوب او قهرمان عسكرلرى بكله‌يوردم.

سس يوق

بارلا لاحقه‌سى