سنى تشويق ايچون دگل، چونكه تشويقه محتاج دگلسڭ. هم مدارِ فخر اولمق ايچون دگل، چونكه فخر ايسه عُجب و ريايه مداردر. بلكه سڭا مدارِ شكر اولمق ايچون دييورم كه

سن و حقّى أفندى بنم ايچون يوز جدّى طلبه حكمنه گچديڭز. حتّى دييه‌بيليرم كه: قدرِ إلٰهى بنى بو يرلره گوندرمسى، سزلرى شو وظيفۀِ قدسيه‌ده اويانديرمق ايچونمش. شيمدى شو زمانده ايمانِ تحقيقينڭ درسنى ويرمك، پك بيوك بر فضيلتدر و قدسى بر وظيفه‌در. ايمانِ تحقيقى‌يى طاشييان بر مؤمن، چوق مؤمنلره بر نقطۀِ إستناد اولور كه؛ شعورسز اولارق عوامِ مؤمنين او ايمانِ تحقيقى صاحبنڭ قوّتِ ايماننه إستناد ايده‌رك، قوّۀِ معنويه‌لرى قيريلماز، ضلالتلره قارشى طايانيرلر

ايشته شويله بر درسده بولونديغڭز ايچون جنابِ حقّه شكر ايتمليسڭز. بن ده جنابِ حقّه يوز بيڭلر شكر ايدييورم كه، او قوّتلى اوموزلريڭز يوكم آلتنه گيرديگى ايچون ضعيف اوموزم آغيرلقدن قورتولوب روحم راحت ايتدى. إستراحت بولان روحم سزه تقديركارانه و منّتدارانه باقييور. و مسئوليتدن قورتولان قلبم ده موفّقيتڭزه دعا ايدييور. و إجراىِ وظيفه ايچون چوق دوشونمكدن قورتولان عقلم ده سزى تبريك ايدييور. بن شو وظيفۀِ قدسيه‌ده بيلميه‌رك إستخدام اولونوردم. سز بيله‌رك خدمت ايدييورسڭز، بختيارسڭز. إن شاء اﷲ نيّتِ خالصه‌ڭز، بنم مشوّش نيّتمى دخى تصحيح ايده‌جكدر. شيمدى باشقه بر قاچ نقطه‌يى سزه بيان ايدييورم