اوته‌كى مكتوب، چوق يوكسك و چوق گنيش حقائقه إشارت ايتديگى و حدسز عالمِ علويه‌نڭ و نهايتسز عالمِ معنويه‌نڭ بر نوع خريطه‌سنه إشارت ايتديگى ايچون صافى، مشغله‌سز، أرضى و أرضليلردن صيريلوب يوقارى‌يه چيقان بر عقل لازم ايدى. حالبوكه بنم غيرتلى قارداشم، او وقت زمينڭ خريطه‌سنى آلاجق بر وظيفه ايله مشغول اولديغندندر كه، او علوى و پك كسكين ذكاوتڭ او مكتوبه قارشى سكوتى إلتزام ايتمگه مجبور اولمش.

عزيز، صدّيق، وفادار، حقيقتلى، فداكار قارداشلرم نوح بك، منلا عبد المجيد، منلا حامد!

چوق مبارك هديه‌ڭزى آچدق گوردك كه، وان هديه‌سى دگل، بلكه مدينۀِ منوّره و روضۀِ شريفه‌نڭ مبارك كرامتلى هديه‌سيدر. هم فيآتى، اوستنده يازيلديغى گبى يگرمى بش ليرا دگل، يگرمى بش بيڭ ليرادن فضله معنًا قيمتليدر. او مبارك هديه‌يى مدينۀِ منوّره نامنه، بو حواليده‌كى قرآنِ حكيمڭ خدمتنده خالص خدمتكارلرينه و بنم آرقداشلريمه توزيع ايتمك ايچون (على الرأسِ والعين) قبول ايتدك. فقط بو معنوى هديه‌نڭ أهمّيتلى بر سرّى بولونديغى بڭا إخطار ايديلدى. يعنى جنابِ حقّه يوز بيڭ شكر ايدييورم كه، قرآنه و ذاتِ رسالته خدمتمزڭ بر علامتِ مقبوليتى نوعندن اولارق، بر إلتفاتِ نبوى‌يى حسّ ايتدم.