أى بو دارِ فانيده مدارِ تسلّيلرم، بو ديارِ غربتده أنيسلرم و أسرارِ قرآنيه‌ده بنى إشتياقلريله قونوشديران ذكى، فراستلى مخاطبلرم!

سزلره، يالڭز بر ايكى دقيقه تماشا ايتمكله، نه درجه آجينه‌جق بر حالده، ناقص بر خط ايله چاليشديغمى و سزڭ قيمتدار قلملريڭز، نه قدر بڭا أهمّيتلى اولديغنى إحساس ايتمك ايچون، كندى خطّمله تصحيحسز بر فهرستۀِ حروف گوندرمشدم. حالبوكه سزلر بر ايكى دقيقه دگل، ساعتلرجه باقديڭز و گونلرجه ضبط ايتديڭز. بوندن آڭلادم كه، سز اوڭا فضله مراق ايدييورسڭز. اونڭ ايچون سزه او ليسته‌نڭ تبييضنى گوندرييورم. ايسترسه‌ڭز كنديڭزه بر صورت آليرسڭز.

فقط بونى بيليڭز كه، بو فهرسته موقّت بر مأخذ اولمق ايچون تقريبى بر طرزده‌در. بن قولايلق ايچون، قسمًا أسكى محفوظاتمه، قسمًا ايكى مقياس ايله طوقوز ساعتده پريشان خطّمله يازمشدم. صوڭره آڭلادم كه، بو واديده بر تفسير كويمزده وار. او تفسيرى گتيردك، مقابله ايتدك. أكثريتِ مطلقه ايله توافق ايتمشز، بر قاچ بيوك يكونلرده اون - اونبش كوچك يرلرده مخالفت اولدى. تحقيقات نتيجه‌سنده، تفسيرڭ مطبعه و مستنسخلرڭ أثرِ سهوى اولارق مخالفت اولمش. ايكى اوچ يرده مسودّه ليسته‌مزى تصحيح ايتدك. صوڭره او تصحيحمزڭ ياڭليش اولديغنى آڭلادق، داها ليسته‌مزى دگيشديرمه‌دك. مطبعه خطاسى اولارق تفسير تصحيحه محتاج ظن ايتدك، فقط ايده‌مدك. چونكه صاحبى بيوك بر مدقّق و مطبعه ده جامع الأزهر ياننده و قربنده، أزهرى علماسنڭ نظرى آلتنده اولديغندن تصحيحه جرئت ايده‌مه‌دم.

عين تفسيرى، تبييض ايله برابر گوندرييورم. اوڭا باقارسڭز، فقط تنقيده اوغراشمايڭز. چونكه بنم ليسته‌م تقريبيدر، داها تحقيقى ياپمدم. تفسير ايسه، چوغنده روايته إستناد ايدر. هم بعض سورۀِ مكّيه‌ده مدنى آيتلر گيرمش. بلكه، حسابه داخل ايتمه‌مش. مثلا، سورۀِ العلق‌ده حروفى يوز كسور ديمش. مرادى، أڭ أوّل نازل اولان نصفِ أوّلدر. او طوغرى سويله‌مش. بن ايسه أسكى محفوظاتمه إستنادًا مجموعِ سوره‌يى ظن ايتديگم ايچون اونڭ صوابنده خطا ايتمشم.