هم توافقده‌كى أسرار، كلّى يكونلره باقار. تقريبى فهرسته بزه كافيدر. كنز العرشڭ اوچ نكته‌سنده يازيلان توافقات، كسوراتڭ دگيشمه‌سيله دگيشمزلر. بلكه بيوك يكونلرڭ دگيشمه‌سيله دخى او توافقات بوزولماز. مثلا، سورۀِ كهف ايله اوتوز طوقوز سوره، بيڭ عددنده إتّفاق ايدييورلر. بر ايكى دانه بيڭ عددينى غائب ايتسه، او مهمّ توافق بوزولماز. و هكذا... كسوراتڭ چندان أسرارى وار، داها بزه تماميله آچيلمادى. إن شاء اﷲ آچيلديغى وقتده، فهرسته دخى تحقيقى بر صورته گيره‌جك.

جماذى الآخر آينده وقوع بولان {وَاِذَا الْكَوَاكِبُ انْتَثَرَتْ} آيتنڭ إفاده ايتديگى حالاتڭ بر نمونه‌سنى ايضاح ايدن حادثاتِ سماويه ايله، قرآنڭ سماسنده پارلايان لفظه‌’ِ جلال ييلديزلرينڭ عجيب و طاتلى توافقلرينى درس ويرن او قيمتدار مكتوبڭزى، حافظ على قارداشمز ده داخل اولديغى حالده رأفت، بكر، لطفى، رشدى، كچه‌جى مصطفى أفندى و آغابگم على أفندى ايله برابر اوقودق. او گيجه مجلسمز پك طاتلى ايدى. حادثاتِ سماويه‌يى حيرت و تعجّبله و پك بيوك بر سَوينجله قارشيلايه‌رق، ملأِ أعلانڭ بايراملرينه بز ده إشتراك ايتمشدك. ناصلكه بو حادثۀِ سماويه‌نڭ برنجى دفعه وقوعى، (باشده إنسان صورتنده ياپيلمش هُبَل تعبير ايتدكلرى بيوك پوتلريله ٣٦٠ پوتى إلٰه قبول ايدن) مشركينِ قُريشڭ هلاكنه نتيجه ويرمشدى