بو عنايت و موفّقيتلر، فضيلت و مبجّليتده هر شيئه تفوّق ايدن صوصماز و صوصديريلماز بر سس، فيّاض بر ضيا و نوّار بر عظمتله، يگرمى سكز بيڭ عالمه إماملق ايدن، درس ويرن او فرقانِ أزلينڭ حدسز كرامتلرندن بر كرامتى و نهايتسز معجزه‌لرندن قيغلجيم‌مثال كوچك بر لمعه‌سى ايدى

جنابِ حق درگاهِ عزّتنده قبول بيورسه، بنم گبى ذلّت و مسكنت هر طرفنى قاپلايان قصورلى، عاجز بر عبد ايچون، نه بيوك بر سعادت. ايشته سَوْگيلى استادم! همّتِ عاليڭز كه و {لَوْلاَكَ لَوْلاَكَ لَمَا خَلَقْتُ اْلاَفْلاَكَ} خطابِ عزّتنه مظهر اولان منبعِ فيوضات عليه الصلاة والسلام أفنديمزڭ همماتِ قدسيه‌لريله و رفيق اولان قرآنِ عظيم الشانڭ كرامتلريله و جنابِ واجب الوجود حضرتلرينڭ مساعده و لطفلرى سايه‌سنده و ينه اونلرڭ رضاسى اوغرنده، اُمّتِ محمّد ايچون واسطه اولوب يازديريلان بو قرآنِ كريمى سزه تقديم ايدركن؛ فقير طلبه‌ڭز سزه جدّى بر طلبه، حقيقى بر قارداش، مطيع بر أولاد و پيغمبرِ ذى‌شان أفنديمز حضرتلرينه اُمّت و خلاّقِ كريمه ده كَمْتَرْ بر قول اولابيلمك ديلكلريله أل و أتكلريڭزدن كمالِ تعظيم و حرمتله اوپرم أفنديم حضرتلرى

ايسترم كه يگرمى يدنجى مكتوبڭ طاتلى صدالرى ايچريسنده بنم ده بوغوق سسم چيقسين. لٰكن هيهات او معدنِ أسرار بحرندن دم وورمق حدّم دگل. بنم آرزوم و إشتياقم، او گلستانه گيره‌بيلمك و او گوزل گللردن قوقلامق. يوقسه اونڭ توصيفنده عاجز و قاصريم. گرچه قلبمده غليان ايدن معنالر چوقدر. لٰكن هر نه‌دنسه، لسان حسّياتمڭ ترجمانى اولامييور