شو قدر دييه‌بيليرم كه؛ أليمده موجود رساله‌لر و فهرسته‌ده گورديگمه نظرًا، رسالۀِ نور أجزالرى بر شجرۀِ نورانيه‌در كه، داللرى أقطارِ أرضه نشرِ أنوار ايدييور و إلٰى نهايه ايده‌جكدر. قراڭلقلى بر گيجه‌ده، سماده‌كى ييلديز و قمرلر، زمين يوزنده ناصل رهبرلك ايدرلرسه، رسالۀِ نور أجزالرى ده اويله‌در. و ظلمتده نوره إحتياج نه ايسه، رسالۀِ نور أجزالرى ده اودر

بحرِ ضلالت موجلرى آراسنده، سفينۀِ نوح (ع‌س) نجات ويرر؛ هر كيم داخل اولسه، طوفانِ معاصيدن خلاص بولور. رسالۀِ نور أجزالرى، كُرۀِ أرضڭ موسمِ أربعه كتبخانه‌سنده بر بهاردر و بهار قدر لطافتليدر و جانبخشدر. و ئولمش أرضه او بهار واسطه‌سيله حيات ويريلديگى گبى، رسالۀِ نور أجزالرى ده ئولمش أرض قلوبلره تازه حيات ويرر. رسالۀِ نور أجزالرى مرشددر. إنسانى حقسزلقدن حقّه دونديرر و حيوانلقدن إنسانيته و أسفلِ سافليندن، أعلاءِ علّيّينه يوكسلتير. اوتوز اوچنجى سوزڭ يگرمى دردنجى مكتوبى و أمثاللرى، إنسانڭ روحنده إنشراح حاصل ايدييور. و قلبنده صانعِ حكيمڭ حكمتنه قارشى پنجره‌لر آچييور. رسالۀِ نور أجزالرى، إنسانڭ صيقنتيلى وقتنده إمدادينه يتيشير و تسلّى ايدر. بو جهتى عينًا گوردم. و الحاصل: رسالۀِ نور أجزالرى حقّنده هر نه ديسه‌م، ينه او نوره قارشى سونوكدر. ايشته او فهرسته‌لر فهرسته‌سى بويله اولونجه، داها ايلريسنى أهلى اولان آڭلار